WILLEMSTAD -- Curaçao Airport Partners (CAP) a kontribuí ku kasi 40 mion florin den kaha di gobièrnu di Kòrsou te awor. Asina e kompania ta bisa relashoná ku progreso i desaroyo di Aeropuerto Hato despues di e di dos aniversario di apertura di e terminal nobo ku a risibí e promé pasahero dia 31 di yüli 2006. Dia promé di ougùstùs último tabata e di 5 aniversario ku CAP a tuma e operashon i desaroyo di aeropuerto.
Direktor di CAP, Walter Abernathy ta bisa, ku durante e periodo di 5 aña aki CAP a desaroyá aeropuerto invertiendo mas ku 100 mion florin pa traha un terminal nobo ku ta efisiente i ku tin kapasidat pa ekspandé den futuro i den renobashon di e edifisio di e terminal bieu. “Tambe nos a paga Curaçao Airport Holding N.V. 39.7 mion florin na pago di konseshon i otro pagonan. Promé ku CAP a tuma e operashon di aeropuerto over, Curinta tabata eksperenshando problemanan finansiero di défisit i Gobièrnu no tabata risibí pago manera ta e kaso awor. CAP a trese un kambio den e situashon finansiero aki pa Gobièrnu di Kòrsou i a la bes a alsa aeropuerto riba nivel di stándartnan internashonal i tambe a aportá na e oumentá supstansial di tráfiko aéreo”, asina Abernathy a bisa.
CAP a anunsiá tambe un seri di mehorashonnan ku a wòrdu hasí /òf ta na kaminda pa wòrdu hasí entre otro:
• Pone mosaiko den tur tualèt
• Protekshon kontra di áwaseru kaminda ta eksperensiá problema den e terminal
• Isolá e salanan di espera den terminal pa evitá ku airu kayente ta drenta
• Pone stul den área di check-in
• Sera i instalá èrko den e área di screen ekipahe di man
• Instalá telefon públiko den sala di salida
• Instalá wireless internet den terminal ku por usa sin pago di un tarifa
Pa loke ta trata e aktividatnan operashonal, durante e periodo di 5 aña aki, e aeropuerto a pasa e ouditoria di ICAO ku éksito i tambe diferente ouditoria di seguridat di TSA di Estádos Unídos. Na luna di aprel 2008, CAP huntu ku e base aéreo militar Merikano F.O.L. i otro instansianan, a hasi un ehersisio di simulashon di un emergensia. Tambe a introdusí un proseso anual di preparashon pa temporada di orkan huntu ku tur aktornan relevante.
Pa por haña un idea kon e pasahero ta eksperensiá nos aeropuerto, tur kuartal CAP ta laga un kompania internashonal hasi enkuesta bou di e pasaheronan ku ta hasi uso di nos aeropuerto, pa asina por kompará e nivel di servisio di nos aeropuerto ku otro aeropuertonan internashonal. Di akuerdo ku e resultadonan di e enkuestanan den kual sr. Abernathy ta bisa, ku e satisfakshon en general bou di pasaheronan ku ta biaha pa un destinashon internashonal a oumentá ku 33% for di dia ku e terminal nobo a habri. CAP ta spera ku na final di e aña aki, despues ku mas mehorashonnan wòrdu finalisá i a duna ainda mas atenshon na servisio ku ta brinda pasaheronan, lo por ripará un otro oumento den e porsentahe menshoná. E kantidat di empleado ku ta traha na CAP tambe a konosé un oumento di 20% (31 persona) for di dia ku CAP ta responsabel pa operashon i desaroyo di aeropuerto. Finalmente Abernathy a bisa, ku CAP ta hopi kontentu ku nos aeropuerto ta kontribuí na Kòrsou su ekonomia ku invershonnan, kupo di trabou, tráfiko aéreo i desaroyo ekonómiko. “E logronan aki durante e último 5 aña ta resultado di trabou duru desplegá pa tur empleado di CAP i aporte di tur otro miembro di e famia grandi ku ta traha na aeropuerto”, asina e gerente general a bisa.