Minister Plasterk: Minister Leeflang ta bruha konseptonan den otro

WILLEMSTAD – “Minister Omayra Leeflang ta bruha konseptonan den otro. Un matrimonio di hendenan di e mesun sekso ta un matrimonio serio”, asina minister di emansipashon di Ulanda, Ronald Plasterk a bisa relashoná ku komentarionan di su kolega antiano. Minister Plasterk tabata un di e karanan konosí di gabinete ulandes durante Gay Pride 2008 ku tabatin djasabra na Amsterdam.
Den un entrevista ku Radio Nederland Wereld Omroep, minister Plasterk a bisa ku e tin masha konfiansa pa loke ta trata kaso di apelashon ku Gobièrnu di Antia a kuminsá kontra e hecho, ku mester rekonosé matrimonionan di mesun sekso será na Ulanda. “E posishon di gobièrnu ulandes ta masha kla. Ora sera un akta den Reino Ulandes i esei ta konta pa aktanan di matrimonio tambe, esei ta konta segun artíkulo 40 di Statüt di Reino pa Reino Ulandes kompleto”, asina e minister a bisa.
Segun e minister, su kolega antiano Leeflang ta bruha dos kos den otro. “Di un banda tin e drechi di Antia pa tin su mes legislashon riba tereno di matrimonio. Otro ta matrimonionan será na Ulanda. No ta un chiste, “flauwekul”, pero matrimonionan real. Nan tin konsekuensia hurídiko na Ulanda, pero tambe den Reino”, asina e minister a bisa.
Plasterk a bisa, ku e lo boga pa Antia tambe habri su matrimonionan pa hendenan di mesun sekshon. “Pero einan parlamentu di Antia tin e derechi pa rechasá e proposishon aki loke parlamentu ulandes si a aseptá algun aña pasá”, asina e minister a bisa.
Miéntras tantu Gay Pride 2008 tabata un éksito kompleto. Hòmbernan baliando den tur sorto di forma, muhé ku kasi nada di paña na nan kurpa, un públiko gosando sin fin tabata ingredientenan di e fiesta di homoseksualnan ku a tuma lugá den fin di siman na Amsterdam, konosí komo Gay Pride. Tabata di 13 biaha ku botonan tabata nabegá den awanan di Amsterdam selebrando Gay Pride. E aña aki tabata un poko diferente. Pa di promé biaha ku tabatin un boto riba kua homoseksualnan antiano, arubiano i sürnam tabata nabegá, tabatin un boto ku tabata representá e grupo di homoseksual di kuerpo polisial di Amsterdam i tabatin un boto ku hòmber i muhé homoseksual kristian. E ministerio di Defensa di Ulanda sinembargo no a pèrmití pa militarnan ta presente ku nan paña militar na e parada aki.
Manera ta konosí, dado momentu tabatin menasa ku e boto ku homoseksualnan antiano lo no a partisipá mas, pasobra un kantidat grandi di partisipante a kanselá nan partisipashon. Pero e organisadónan a logra tòg ku e boto a partisipá. Interesante ta, pa menshoná tambe ku tabatin vários polítiko di Den Haag ku tambe a partisipá. Alkalde Job Cohen di Amsterdam tambe tabata presente.
Mas o ménos mitar di dos di mèrdia, e promé botonan a sali for di Westerdok, ku na kabes e barku di agentenan polisial homoseksual, un barku ku e nòmber “Roze in blauw”. Algu despues di seis or di atardi e último botonan a pasa dilanti e públiko grandi ku tabata para na banda mira. Tabatin un total di 80 boto ku a partisipá. Den mayoria kaso un DJ a sòru pa e músika nesesario, riba kua hòmbernan homoseksual i muhénan lesbiana tabata baila. Tabatin un boto di gobernantenan, riba kua por a mira e ministernan Ronald Plasterk, Bert Koenders i tambe Guusje ter Horst.
Tabatin tambe algun sekretario di Estado presente. Notabel ta, ku ta mandatarionan di e partido PvdA so tabata representá. Un dado momentu tabata parse ku e fiesta lo a sufri un retraso, ku deklarashonnan di minister Elmert van Middelkoop di partido ChristenUnie, kende a bisa ku partisipashon di PvdA “kisas ta un poko provokador” kontra su partnernan di koalishon CDA i su mes partido. Pero minister Plasterk a sigurá mesora, ku e ta partisipando na nòmber di gabinete Balkenende. Sekretario di Estado Sharon Dijksma a rechasá e insinuashon di Van Middelkoop. Por sierto ku Van Middelkoop a prohibí su kolaboradornan pa partisipá na e parada di homoseksualnan. “Ami no por imaginámi, ku partisipá na un parada ku tin komo filosofia defendé derechi igual di homoseksualnan den nos komunidat, por ta un provokashon,” ta loke Dijksma a agregá.
E organisadónan ta kalkulá ku un mei mion hende a para wak e parada kant’i awa, un kantidat rèkert. Loke tambe tabata un rèkert ta e kantidat di 80 boto ku a partisipá. Frank van Dalen, presidente di ProGay ta hopi kontentu. El a papia di “un fiesta grandi”. El a bisa, ku otro aña e evento lo ta mas grandi ainda. Nos ke sigui sorprendé komunidat, ta loke el a bisa. Polis tambe ta kontentu, pasobra kos tabata trankil. No tabatin nada menshonabel ku a sosodé.
Riba e pòtrètnan por mira diferente miembro di gabinete ulandes presente na Gay Pride, entre nan ministernan Ter Horst, Koenders i Plasterk. Riba e otro pòtrèt por mira alkalde di Amsterdam, Job Cohen riba e boto ku a habri e parada.