NEW DELHI – Un total di 145 persona, entre nan un kantidat di mucha, a muri djadumingu pa motibu di un korementu di miles di peregrinonan rondó di un tèmpel hindú na nort di India, asina polis a bisa.
C.P. Verma, a bisa ku e korementu a tuma lugá pa rumornan di un avalancha, pero ku e situashon a bira pió ora demasiado peregrinonan a trata di kore ku difikultat den un aria chikí.
Algun shen peregrinonan tabata den e tèmpel den un seru.
Fotonan saká na e lugá a mustra ku mayoria di e kadavernan tabata di mucha i hende muhé. Algun dje víktimanan a kai den bashí i otronan a muri trapá durante e korementu.
Kanalnan di televishon a mustra imágennan tristu di e kurpanan di diferente mucha chikitu.
Na e hospital Bilhaspur, reskatistanan a baha for di un trùk kadavernan lorá den paña i tabata pone nan na rei pa nan ser identifiká pa nan famia.
“Awor aki nos esfuersonan ta riba reskate. Asina ku esaki kaba, nos lo investigá e motibu”, Anurag Garg a bisa, un funshonario haltu di polis.
E hendenan tabata asistí na un festival religioso di nuebe dia den e tèmpel di Naina Devi, den e distrito di Bilaspur, na e estado Himachal Pradesh, Verma a bisa.
Polis a usa un telefériko ku ta konektá ku e tèmpel pa baha e morto- i heridonan for di e kabes di seru, miéntras tabata manda helikòpternan pa yuda den reskate di e hendenan den e tèmpel situá na pia di Himalaya.
Polis a bisa ku durante e korementu un pasamano (rail di man) ku tabata bai e seru a kai, i kantidat di hende a bini abou.
E korementunan mortal ta echonan masha normal den e tèmpelnan na India, kaminda multitutnan grandi – na okashonnan algun shen mil hende – ta reuní den arianan chikitu ku no tin instalashonnan pa kontrolá reunionnan asina grandi.
E peregrinonan a bai e tèmpel pa selebrá Shravan Navratras, un festival ku ta honra e diosa hindú Shakrti, o mama divino.
Djadumingu tabata e di dos dia di e festival i outoridatnan tabata trata di duna otro peregrinonan konfiansa. “No mester drenta pániko, tur kos a bira normal awor”, Verma a señalá.
Bilaspur ta na un 250km nortost di New Delhi.