Minister Presidente mesora a yama sindicatonan pa un reunion urgente awe mainta

ORANJESTAD- Te na ciera di e edicion di La Prensa Aruba di awe, ainda e reunion entre sindicatonan di trahadornan di Elmar, esta UEA y di WEB, esta SIWA, ta den reunion.
Unico topico di discusion ta e intencion di Gabinete Oduber IV pa cambia statutonan di e companianan di utilidad, pa asina por eherce mas presion riba e Hunta di Comisario y directornan, pa por haya placa di e companianan aki, ora cu Gobierno kier.
E conflicto di mas grandi ta cu e director di compania Elmar, esta Freddy Rafini, kende pa algun tempo caba ta den clynch formal cu Minister Presidente Nel Oduber y su gobierno, ya cu no kier coopera pa duna Gobierno voorschot riba ganashinan di e aña entrante.
E decision di Nel Oduber pa bai trece cambio den e statutonan di e companianan di utilidad, ta simplemente pa su Gobierno por yega na fondonan di e companianan aki, pa cubri e crisis financiero di su gobierno.
For di siman pasa SIWA y UEA a mustra Gobierno cu nan no ta acepta pa Gobierno introduci cambio den e statutonan, ya cu ta for di algun tempo caba principalmente Premier Oduber, a bin ta criticando e salario di trahadornan di e dos companianan di utilidad aki, y di nan directornan.
Na varios occasion Nel Oduber a cuestiona e placa cu e trahadornan aki ta cobra y cuanto nan ta bai cas cune, mientras cu otronan den e sector di Gobierno, no ta alcanza e nivel di salario aki hamas.
E sindicatonan for di prome cu fin di siman a mustra Nel Oduber y su gobierno, cu nan no ta bai tolera ningun cambio di ningun statuto y si Gobierno sigi cu e intencion aki, pa e siman aki lo tin un “blackout” completo na Aruba.
Mientras cu den fin di siman Nel Oduber a emiti un comunicado di prensa y a dirigi un carta na e sindicatonan aki, mustrando cu e unico cambio ta pa e statutonan di NV Elmar, e sindicatonan a manda e mensahe bon cla pa Gobierno, cu nan no ta haci wega.
Awe mainta, despues cu ayera tardi nan a anuncia esaki, e sindicato UEA a bai den accion mientras cu SIWA tin su hendenan riba un alerta na WEB, sperando riba resultado di e reunion di awe mainta pa mira si nan ta bai den accion mesora of no.
Hecho ta cu Nel Oduber y su gobierno a sinti e presion y seriedad di e crisis aki, ya cu asina cu e trahadornan di Elmar, parcialmente a bandona pia di trabou despues di un reunion urgente awe mainta y nan a cana bai oficina di Gobierno riba Boulevard, Premier Oduber a convoca un reunion di urgencia invitando representantenan di e dos sindicatonan pa sinta na mesa riba e asunto aki.
Su accion ta liña recta contra di un comunicado di prensa cu su propio gobierno a emiti ayera tardi y cu awe La Prensa Aruba ta publica, caminda Gabinete Oduber IV ta acusando e sindicatonan cu ta nan kier goberna e pais, y ta nan kier tuma decision di loke Gobierno tin cu haci of keda sin haci.
Henter e situacion aki ta bolbe mustra e nivel di e crisis financiero cu Gabinete Oduber IV a hinca su mes aden, caminda ningun medida tuma, ningun accion tuma pa baha gasto y yega na un supuesto presupuesto balansa, ta logrando y cu e crisis ta sigui bira peor.