Gobierno ta acusa AVP y RED di ta tras di sindicatonan

ORANJESTAD- Den un comunicado di prensa emiti ayera tardi, partido MEP ta acusa sindicatonan di trahadornan di companianan di utilidad, di kier goberna e pais y kita mando for di Gabinete Oduber IV.
“Den tur estado di derecho y democratico bo tin derecho y obligacionnan y cada un den comunidad mester carga su responsabilidad. Den nos pais tin lidernan sindical cu a lubida cu nan tin cu sali na vanguardia y interes di e trahador y no di e hendenan cu kier defende nan propio interes.
Un di e ehempelnan clave ta e actitud di e presidente di UEA y e presidente di SIWA, kendenan ta menasa henter un pueblo, un comunidad, un pais y un gobierno legitimamente eligi den un eleccion democratico, cu cada rato si no duna nan nan kier, nan ta bin cu e menasa di kita awa y coriente, esta poniendo henter un pais plat.
Hecho ta cu na final di 2001 un bari di petroleo tabata costa apenas 17 dollar y awe esaki ta 135 dollar – un aumento di 118 dollar! – cu ta nada menos cu 800% di aumento. Bo por ta AVP, REDashi y contra tur proyecto di Gabinete Oduber, pero pa absorba 800% di aumento si ta algo cu nos tur mester tuma hopi na serio, pasobra e factor externo aki tin su multiple efectonan ariba henter nos bida.
Mientras tur otro caminda a tene cuenta cu e efectonan dramatico como cu no tin competencia den produccion di awa y coriente, nos tin hende na Aruba ta pensa solamente ariba probecho politico, pasobra si bo mira nan salario compara cu cualkier otro compania, nan a ser recompensa grandemente den salario y beneficionan secundario.
E critica contra gobierno ta como sifuera no tin e voluntad pa haci algo ta grandi mes, mientras cu instrumentonan cu e comisarionan den WEB y Elmar tin pa ehecuta nan responsabilidad ta fuera di e tempo aki.
Con den un pais democratico, sindicatonan di dicho companianan por tin e pudor di exigi di gobierno pa para cambionan den Statuut di Elmar N.V. cu no tin nada di haber cu nan posicion huridico, unda hasta nan kier discuti posicion di e director. Cu den un mundo transparente nos gobierno no tin problema pa informa sindicatonan di e cambionan ta muestra di un democracia bibo, apesar cu e moda di opera di e sindicatonan di dicho companianan ta un forma dictatorial, esta di pretende di ta nan ta determina con cos tin cu bay den e pais aki .
E atakenan politico di e lider sindical di SIWA contra Gabinete Oduber ta un muestra claro ken ta tras di henter e scenario aki. Nos a kere cu un lider sindical mester ta neutral y no un vocero di un partido politico. Ta un lastima cu pa falta di formacion sindical un ‘lider’ ta lastra garoshi pa un director di Elmar, pasobra kier haci cambio di Statuut.
Casi tur dia den companianan na Aruba den bienestar di transparencia ta cambia Statuutnan, manera AVP a cambia esun di FCCA, esta di meta social pa uno comercial pa por a cumpra pa Af. 1,00 100 miyon florin di debe, lagando e fundacion casi sin un vermogen acceptable y cu ta gracias na e diligencia di nos gobierno cu a scapa e fundacion, apesar cu te awe tin persona cu no ta pagando nan debe.
Dia den un pais sindicatonan cu no tin nada di haber cu cambio di Statuut, manera por ehempel esun di Elmar N.V., kier determina e rumbo y maneho di gobierno, algo no ta bon den nan pensamento kico verdaderamente ta nan lugar den nos comunidad.
Un gobierno cu a ser eligi pa dirigi nos pais y no pa ser dirigi pa hendenan cu ta maluza nan posicion como lider sindical pa cada vez trata na saca probechonan politico.
Gobierno a cambia na 1993 Statuut di WEB N.V., a cambia di AAA N.V., a cambia di Arubus N.V., di Setar N.V. etc.
E weganan unda cu director cu no kier duna cuenta ta uza lidernan sindical pa menasa henter un comunidad ta algo di condena.”