ORANJESTAD- Den luna di october 2008 Diocesis di Willemstad ta organisa un Conferencia na Curaçao na unda un plan strategico pastoral lo wordo compila pa e Obispado di Willemstad pa e aña 2008 – 2011.
Punto di salida di e proceso aki ta e documento di Aparecida di Brazil cu a keda cla na aña 2007.
Den conclusion di e documento aki ta para: “Nos mester un Pentecoste nobo! Nos mester sali na e encuentro di e personanan, famianan, e comunidadnan y e pueblonan pa comunica y comparti e don di e encuentro cu Cristo, cu a yena nos bida di “sentido”, di berdad y amor, di alegria y di speransa!”
Pa yega na e plan aki a usa e metodo di refleccion teologico-pastoral: “MIRA, HUSGA Y ACTUA”.
Diocesis di Willemstad tambe kier a camina e plan strategico pastoral usando e mesun metodo.
Pa motibo aki den lunanan mei, juni y juli 2008 a tene un encuesta y entrevista bow di e catoliconan di Antias y Aruba, como parti di e fase “MIRA” ; na tur e islanan e ehercicio aki a tuma lugar.

Por menciona cu tin e siguiente resultado:
ENCUESTA ENCUESTA ENTREVISTA
ISLA ADULTO HOBEN
Aruba 259 359 7 cu un total di 11 persona
Bonaire 105 18 3 cu un total di 13 persona
Curaçao 599 206 4 cu un total di 24 persona
Saba 35 33 4 cu un total di 6 persona
St Eustatius 29 10 7 cu un total di 8 persona
St Maarten 52 59 3 cu un total di 22 persona
TOTAL 1079
685
84 persona

E resultado final di e encuesta ta cla y awor ta den su fase di analisis.
Pa prepara e conferencia diocesano, e fase HUSGA, den october 2008 Diocesis di Willemstad ta organisa un Pre Conferencia ariba tur e islanan di e Diocesis den luna di agosto 2008.
Den esaki lo pone atencion special riba e estudio di e areanan:
* Union y Comunion
* Planificacion y Structura di Diosesis
* Educacion y Formacion
* Evangelisacion y Mision di Iglesia
* Liturgia
E Pre Conferencia di Aruba lo tuma lugar ariba Diaranzon 27 di 4ór pa 10ór di anochi y Diahuebs 28 di agosto di 6ór te 10ór di anochi den e edifcio di E.P.I na Sero Blanco.
E 5 topiconan menciona ariba lo forma parti di e tayernan di trabow di e 2 dianan aki.
Di tur parokia di Aruba ta spera un cantidad di 20 persona pa elabora ariba e topiconan.
Ta spera personanan catolico di tur gremio di nos comunidad pa yuda determina y prepara e documento final di e Pre Conferencia.
Den e dianan benidero e personanan cu lo participa den e tayernan di trabow lo haya invitacion pa esaki cu un peticion pa nan yena e formulario di inscripcion y entrega esaki na e parokia concerni.
Na final e resultado di Aruba lo wordo sintetisa y e resultado lo wordo treci dilanti durante e Conferencia di Diocesis cu lo tuma lugar na october 2008 na Curaçao.
Durante e misa di Cristo Rey na november, cual ta e comienso di e aña liturgico nobo di iglesia catolico e plan strategico pastoral lo wordo presenta, cual ta e fase final “ACTUA”.