WILLEMSTAD – Falta di konosementu profundo di reglanan i leinan di tráfiko ta pone, ku hopi bia hende ta kometé eror ora nan ta papia di e materia. Pa por splika un aspekto di e materia, e persona ku ke splika mester ta informá di tur aspekto. E materia ta manera un pùzel i si bo no tin tur e pidanan bo splikashon nunka por ta kompleto.
Den e INFO-dosis ku Ombudsfunctionaris a emití ayera, el a skibi entre otro; “De bestuurder van een outo dient zich dus ingevolge de bepalingen van de WVVC in beginsel steeds aan de rechterzijde van de rijbaan te bevinden (behalve bij inhalen of voorbijrijden van op de rijbaan rijdende of staande weggebruikers en bij voorsorteren). Sinembargo Ombusdfunctionaris a lubidá riba e prinsipio di ‘keep your lane’. E prinsipio akí ta propagá mas trankilidat posibel riba kaminda. Esei ta nifiká, ku outomobilistanan mester trata na kambia di via mas ménos posibel. Esaki en prinsipio ta hasi posibel ku un outomobilista por kore na su man robes pa basta ratu kubriendo un distansia di hopi kilometer sin problema.
Por ehèmpel, un outomobilista ku subi Schottegatweg via di Gosieweg i bai den direkshon di Rio Canario, por keda kore na su man robes te Palu Blanku, subi Nijlweg i keda kore na su man robes, subi Dòmi i Brùg Juliana i keda kore na su man robes, baha brùg pasa Parera i yega na Amstel, subi Nieuwe Haven na su man robes i keda kore na su man robes te ora e yega na altura di Asiento, kaminda finalmente e ta lora i subi Regentesselaan. E outomobilista akí a mantené su via, (keep your lane), pasó for di ora el a subi Schottegatweg e tabata sa ku ta Regentesselaan e ta bai. Ounke ora el a sali Gosieweg i subi Schottegatweg e por a drenta Emmastad mes ora, e echo ku el a keda kore riba su man robes i pasa kasi rònt Schottegat no ta nifiká ku el a kometé un infrakshon di tráfiko. I esaki ta e pida di e pùzel ku Ombudsfunctionaris a falta. E ta skibí den paragraf 8 artíkulo 30 punto 2. “ Indien de weg bestaat uit twee gescheiden rijbanen, bestaande uit meer dan één rijstrook in dezelfde richting, mogen andere bestuurders, dan die genoemd in artikel 32 tot en met 35, de rijstrook blijven volgen waarin zij zich bevinden.”
No ta Ombudsfunctionaris so a falta pida di e pùzel di tráfiko. Algun luna pasá e èks hefe di S.K.S, Ruben Angel, a manda un remetido pa LA PRENSA den kua e ta sugerí pa LA PRENSA koregí un publikashon den kua tabatin menshoná, ku por stashoná na man robes di kaminda dilanti di The Movies i F.K.P. Den e remetido tabatin skibí ku LA PRENSA a pèrdè for di bista, ku aparte ku tin bòrchi di tráfiko tin regla di tráfiko tambe. Sinembargo sr. Angel a falta un pida di e pùzel ku ta bisa bon kla den Hoofdstuk II, paragraaf 1, artikel 4; “Verkeerstekens gaan boven verkersregels, voor zover deze regels onverenigbaar zijn met de tekens.” Esaki ta nifiká, ku si lei ta stipulá ku no tin mag di stashoná na man robes, pero na un sitio tin un bòrchi ku ta indiká ku ta prohibí solamente pa stashoná na man drechi, outomátikamente esaki ta nifiká ku por stashoná na man robes, pasó den e kaso akí e bòrchi tin preferensia riba e lei. Den e kaso na The Movies i F.K.P. tin un bòrchi ku ta prohibí pa stashoná na man drechi, miéntras ku na man robes no tin un bòrchi ku ta prohibí pa stashoná. Lei ta bisa ku e bòrchi ku ta prohibí pa stashoná, ta konta solamente pa e banda di kaminda ku e ta poné!