BOGOTA – Presensia di un konvoi ku fanátikonan di Atlético Nacional den un zona reservá pa siguidónan di e klup lokal Atlético Bucaramanaga a ser interpretá komo un provokashon i a kousa un bataya kampal ku saldo di ocho herido, dos di nan di gravedat, i 20 detenido, polis a bisa.
Polis a promové un akto di pais entre e barranan di ámbos banda, pero e akuerdo a ser kibrá djadumingu promé ku e wega na momento ku shofùr di e konvoi a separá su mes di e karavana.
E bochincha a dura asta despues di e wega ku a empatá 1-1, pa di tres fecha di e torneo Klousura di futbòl kolombiano i e Skuadron Móbil Antidisturbio di Polis a hañ’é ku problema pa pone òrdu bèk.
Wilson Múnoz Vélez di 18 aña a sufri heridanan ku kuchú den pechu, un di nan a afektá un pulmon, i Sebastian Alvarez a risibí un gòlpi den wowo drechi i el a afektá su retina, Krus Kòrá a bisa.
Komandante di polis metropolitano, general Orlando Pineda, a anunsiá na prensa ku un di e detenidonan tabatin un revòlver i el a lòs diferente tiru i otro, un menor di edat, tabatin tres arma blanku di plak na su lomba.
“Algun persona no por a drenta e stadion pasobra nan tabata fuma i den estado eksitá al pareser pa efekto di sustansianan ku ta manda nan haltu”, Pineda a bisa.
E duelo na Manizales entre e lokal Once Caldas i América tambe a kousa enfrentamentunan entre e fanátikonan, i un di nan, Richard Andres Bautista, a ser heridá ku arma blanku.
Polis a anunsiá ku el a konfiská 92 arma blanku promé ku e wega ku Caldas a gana 2-0 i ademas a kontrolá frikshonnan den un tribuna pa poseshon di un “trapo” (bandera) di un di e bandanan pero e asuntu no a bira grandi.
Pareu ku e enfrentamentu entre e barranan, algun tékniko, entre nan Hernan Dario Gomez di Santa fe di Bogotá i Pedro Sarmiento, di Cucutá, a kuestioná e aktuashon di e rèfrinan i a afirmá ku nan ta sinti nan mes “hòrtá”.
Santa Fe ku tin un ekselente ekipo, apénas a empatá 0-0 na kas kontra un chikí, Deportivo Pasto, miéntras Cucutá a kai 1-0 ku e lokal Independiente Medellin i ta kompartí ku La Equidad e último puesto ku un punto, seis ménos ku e lider Deportes Tolima.
Otro treiner, e uruguayo Julio Avelino Comesaña, a trata di dal un fanátiko di Atlético Junior di Barranquilla un moketa. E tim ta menasá pa bai abou. E suseso a tuma lugá pasobra nan a insult’é pafó di stadion despues di e derota 1-0 kontra e lokal Envigado.
Imágennan di insidentenan a ser transmití pa televishon i ademas di e moketa frakasá por a opservá ora Comesaña tabata trata di persiguié pero el a ser tené pa miembronan di e tim “Tiburón” i polis.
Komienso di e segundo mitar di temporada a keda dominá pa un kresiente violensia. Un fanátiko di Deportivo Cali kende tabatin un kamisa di América bistí a ser matá un siman pasá pa miembronan di un barra brava di Santa F di Bogotá. E insidente a tuma lugá riba un karetera te na ekstremo sùit di Bogotá.