WILLEMSTAD – Bastante mayor a akudí na Ofisina pa Finansiamentu di Estudio (SSC) awe mainta pa pone preshon, pa por haña e plaka di fiansa pa studiantenan ku ta keda studia na Kòrsou. Ku e fondonan aki e muchanan por haña nan entrada na e diferente skolnan.
E siman aki skol lo habri djaweps, pero ku bastante problema, debí ku tin skol ku no ke aseptá e studiantenan sin plaka na man. Un kantidat di 600 studiante a bin na remarke pa un fiansa di SSC. Nan a risibí un karta, den kua e fundashon ta konfirmá e aprobashon i e studiante mester yena ku e ta bai di akuerdo ku e kondishonnan. E karta aki mester ta sufisiente pa skolnan por duna atmishon na e studiantenan, ya ku e karta aki ta un konfirmashon ku e fiansa ta den proseso. Esnan ku a logra yena e formulario i entregá e dokumentu aki, lo risibí un karta definitivo ku e skol ta mira ku e studiante tin su fiansa. Pero e studiante no ta risibí e suma awor aki. Tur aña SSC ta entregá e fiansa na fin di ougùstùs, pero e aña aki skolnan ta hasiendo ferfelu ku e studiantenan i ta eksigí e plaka for di awor.
LA PRENSA a komprondé, ku mayornan a akudí na ofisina di SSC pa supliká pa risibí e plaka, di manera ku nan yunan por kuminsá nan aña eskolar djaweps awor. Den kombersashon ku un funshonario di SSC el a splika, ku a trata tur petishon i ku mas o ménos 600 studiante lo risibí un fiansa. Tur e muchanan a risibí un karta pendiente e areglonan, den kua kada studiante mester kompletá e formulario di kondishon. Despues ku e formulario keda entregá, e studiante ta risibí su karta di aprobashon.
Pa fin di ougùstùs e fiansa ta drenta na vigor i e ora ei numa e studiantenan lo risibí e plaka pa atendé ku skolnan. A resultá, ku sierto skolnan ta hasiendo ferfelu i ta eksigí nan pago for di awor. Nan no ta rekonosé e karta di garantia di SSC pa pago despues. Un di e skolnan menshoná ta Instituto pa Formashon den Enfermeria (IFE) ku a pone awe komo último dia pa e studiante entregá plaka pa su atmishon i risibí su bukinan. SSC di niun manera lo no por duna plaka promé ku e fecha stipulá di fin di ougùstùs, ya ku esaki ta e areglo ku tin awor aki, asina e funshonario di SSC a bisa.
Siman pasá kaba studiantenan a kuminsá risibí karta di aprobashon, pero sierto skolnan no kier tuma e karta aki. Nan ta bira e alumno bèk pa buska e plaka pa e ora numa e hóben haña atmishon na skol.
LA PRENSA a buska kontakto ku diputado Eugène Rhuggenaath, kende ta remplasá diputado di Enseñansa Marilyn Alcalá-Wallé, pero no por a logra su komentario riba e partikularidat aki komo ku e tabata den un aktividat na WTC.