WILLEMSTAD – Federashon di Otrabanda ta lamentá ku gobièrnu di Kòrsou un biaha mas no ta mustra desensia di por atendé e asuntu di keho ku nan tabatin riba e prosedura di área di Rif. E federashon lo a konfia ku gobièrnu sikiera lo a duna oido pa kontestá e keho ku a keda entregá na Ombudsman. Den kombersashon ku Marushka Manuel ta splika LA PRENSA, ku durante e reunion di federashon Otrabanda a analisá e diferente puntonan, di kua a para ketu na e aktitut di gobièrnu pa e falta di desensia.
Tabata den medionan di komunikashon ku a tuma nota di e instalashon di un komishon, miéntras ku nan tin un protesta aden pa duna kontenido na loke nan ke mustra na e komunidat. Segun Manuel, e forma ku e instalashon di e komishon a tuma lugá sigur mester diskutí ariba, ya ku ta indiká den entrevista, ku federashon Otrabanda lo keda aserká sin mas. E punto kardinal di federashon Otrabanda ta kiko ta bai ku e kriterianan di Plan Mayó ku a keda presentá ku si esaki ta keda ehekutá den e plan ku mester keda desaroyá.
Manuel ta kere, ku no mester sosodé manera den pasado ku gobièrnu ta disidí i no mester di konseho òf sugerensia di otronan. Federashon Otrabanda ta di opiná, ku gobièrnu ta sigui baila riba loke nan a hasi den pasado. No mester t’asina ku ta atendé ku dos invershonista òf tampoko ta disidí di bula bai pa kòmbersá ku invershonista den eksterior. Mester sinta pa hinka un bon plan den otro promé ku aserká invershonistanan.
Federashon di Otrabanda lo sigui kana e kaminda nèchi via di Ombudsman, sperando ku esnan responsabel lo por duna espasio pa diálogo riba a tereno di Rif. Manuel ta sinti un lástima ku ke kuminsá ku algun, pero no ta den e desensia pa atendé ku e kosnan manera mester ta. Federashon Otrabanda tin 8 aña ta warda riba kontesta di gobièrnu, pero awor ta lanta instalá komishon ku diferente hefe di servisio. Awor ku a instalá, ke bisa ku lo drenta den kontakto ku otro instansianan.
Finalmente Federashon Otrabanda ta spera ku lo tene kuantu ku kriterianan ku a keda presentá den Plan Mayó di manera ku esakinan por keda ehekutá.