BEIJING – Ora ta falta un par di dia pa komienso di e Weganan Olímpiko, dos hòmber a kore drenta ku un trùk di shushi riba un grupo di polis ku tabata kore i nan a tira eksplosivo matando 16 agente na e parti ekstremo nort west di China, asina prensa estatal a informá.
E atake a oumentá e tenshon ku ta biba na e kapital pa e weganan internashonal.
E tabata un dje atakenan mas mortal i riská den vários aña na e provinsia di Xinjiang, lugá di un rebelion musulman violento di e zona kontra e régimen chines.
Ounke atake a tuma lugá den un region ketu di China, el a sosodé na momentonan ku e forsanan di seguridat tabata den estado di alerta máksimo, ku temor pa problemanan durante e Olimpiada.
Den e atake, dos hòmber a kore ku e trùk kontra e polisnan, miéntras nan tabata kore dilanti un hotèl durante e ehersisionan di mainta na e siudat di Kashgar, Xinhua a bisa. Al pareser e agentenan ataká ta pertenesé na un grupo paramilitar enkargá ku kuida frontera.
Despues ku e trùk a dal den un palu di lus, e dos atakantenan a bulá afó i a sende eksplosivonan trahá na kas i “tambe nan a hinka e polisnan”, Xinhua a agregá.
Un informe previo di e agensia a bisa ku nan a tira eksplosivo kontra un warda, pero Xinhua a kambia e informe despues, bisando ku e warda ta na un 200 meter di e lugá dje agreshon.
Segun Xinhua, 14 polis a muri einan mes i dos na kaminda pa hospital, miéntras ku komo 16 otro a keda heridá. Polis a arestá e dos atakantenan, un di nan heridá na un pia, el a agregá.
Habitantenan di e zona a bisa ku outoridatnan a reakshoná ku medidanan di seguridat intenso, serando e kayanan.