Lorito ta yama tur hende un felis djamars. Awor si tin manera un periodo di kònkòmber a drenta masha pisá. Ounke skol ta bai habri, Curoil ta sigui den notisia, e kasamentu entre hende di mesun sekso ta kombersashon tur kaminda, no tin un primisia ku ta sakudí tur hende. Ban wak ken ta haña sa algu den e dianan ku ta bin, pasobra un kos ta sigur: notisia tin!
*********
Lorito a haña sa un kos awe ku hopi hende no sa. Parse ku ora bo yega Merka nan por kita bo Ipod, selular i laptop for di bo sin puntra nada. E ta skibí den reglanan di entrada na Merka i ya kaba diferente hende a haña nan konfrontá ku e situashon aki. E medida ta relashoná ku henter e asuntu di terorismo i kòntròl riba entrada di stranheronan na Merka. Tene kuenta ku e desaroyo aki!
*********
Bo a tende e chiste kaba di e dama ku no por a drenta Merka. Parse ku e dama tabatin muchu líkido den su bustu drechá i el a pasa e límite di loke ta aseptabel. E dama a saka tur su koketeria riba e agentenan di imigrashon ku no por a hasi nada otro sino di bisa e dama buska un manera. Lorito di lebumai nos! Kòrda ku ta un chiste!
*********
Un kos ku por konsumí nos masha ta ora ta midi ku dos midí. Boso ta kòrda kuantu kos Gezag a hasi na Las Almas i pone pia abou. Las Almas a muri un morto silensioso, pasobra manera ta papiá den pueblo a yega na sierto interesnan i einan si no ta mishi. Mesun kos ta pasa ku e asuntu di playa. Masha tempu kaba tin moveshon ilegal na kosta, pero no ta presentá i para tur kos a lo macho. Ata pa para manifestashon si tin tantu polis i SKS riba pia. Di kon otro biaha no? Ta e kosnan aki ta duna pueblo rabia i despues ta puntra: ta kiko a pasa anto?

*********

Foto lorito OC

Awe nos ke a dediká nos rúbrika na dos baluarte di Mundu Nobo. E promé ta Orlando Cuales, awendia migrante na Herst, ku a kumpli aña. Edat ta subiendo, pero Orlando ta dunando tur loke ku e tin, demostrando ku basta bo kurpa i mente ta duna, ta ki motibu tin pa stòp di traha? Pabien i hopi aña mas di bida. Por sierto e luna aki masha hende na Kòrsou ta hasi aña. Djadumingu Lloyd a hasi aña i a manda un pastechi i empaná ayera. Michi a hasi aña ayera trit di un bon fruit punch. Pabien!
*********
(foto lorito mito

Den un nota tristu nos ta anunsiá fayesimentu di Guillermo “Mito” Evertsz, tambe hopi konosé den bario di Mundu Nobo. E famianan a konfirmá awe, ku Mito a bai sosegá. Nos no konosé Mito dje bon ei, pero nos a mira di serka kon el a atendé ku tristesa profundo, pero ku dignidat di un patriarka real entiero di su yu Edsel Evertsz ya kaba dos aña pasá E entiero lo ta djabièrnè mainta. Palabranan di kondolensia na famianan di e defuntu. Pas na su restunan.
*********
Nos ta keda te aki awe. Nos ta bai bula pa wak si a sobra pipita di kònkòmber. Si bo tende Triki Trua Trua riba bo kabes, ta nos ta bulando ku velosidat di un avion supersóniko den aire buskando informashon riba tur kos ku ta pasando. Te mañan ku Dios su poder!