WILLEMSTAD – Universidat Nashonal di Antia (UNA) lo haña mas ku 500 studiante nobo aserka e aña aki. For di ayera a kuminsá e siman di introdukshon pa e studiantenan nobo.
Rector-Magnficus di UNA, Jeanne de Bruijne a bisa LA PRENSA awe mainta, ku e ánimo pa e aña universitario nobo ta grandi. Di e kantidat di 500 studiante nobo ku a inskribí te awor, 50 porshento ku ta mas o ménos 250 ta bai Fakultat Soshal-ekonómiko (SEF). E otronan ta repartí riba fakultat nobo di trabou soshal ku a haña mas o ménos 80 inskripshon, e fakultat general (ku lo inkluí probablemente Akademia Pedagógiko) tambe mas o ménos 80 kandidato, Fakultat Hurídiko mas o ménos 50 i Fakultat Tékniko mas o ménos 70.
Pa loke ta trata e diskushonnan ku a surgi na fin di e aña universitario ku CURISES, sra. De Bruijne a bisa, ku e punto ei no ta klarifiká ainda. “Nos punto di bista, ratifiká pa direktiva sinembargo ta konosí”, asina e rector-magnificus a bisa.
UNA mes a informá ku e Siman di Introdukshon manera tur aña e siman di introdukshon ta hopi bon bishitá. Alrededor di 210 di e studiantenan di e promé aña a akudí. Durante e siman akí e studiantenan lo haña guia i informashon serka e mèntòrnan, tokante tur loke ta trata siguimentu di un estudio na UNA. E programa ta konsistí di tambe diferente aktividat sosial kaminda e studiantenan por sera konosí ku otro. Manera ta kustumber, e aña akí tambe tin e ‘Proyekto di Komunidat’. E biaha akí studiantenan a eskohé “Museo nos Tula” na Lanthùis Knip.
E promé dos dianan di e siman di introdukshon lo tuma lugá riba tereno di UNA. Ayera mainta e studiantenan Rector Magnificus Prof. dr. Jeanne de Bruijne a yama e studiantenan bonbiní. Despues minister di Enseñansa Omayra Leeflang a dirigí palabra na studiantenan. Señora Neshiem Ruggenaath manager di Student Services Center di UNA a hasi introdukshon di e mentornan i miembronan di direktiva di “IntrocommUNA” kende ta esnan responsabel pa e organisashon di e siman aki. E siman ta kompletamente organisá dor di studiantenan di UNA. Despues di e apertura ofisial e studiantenan a wòrdu repartí den grupo kaminda nan a haña informashon di e fakultat ku nan ta pertenesé na dje. Durante di e seshon di “UNA- logie” e studiantenan ta sera konosí ku e tereno di UNA pa medio di un spoertocht. Seguidamente lo ofresé tur partisipante e posibilidat pa, den forma di un wega, sera konosí ku otro i tambe pensa riba nan futuro a base di e pregunta unda nan ta mira nan mes aki sinku aña. Riba e di dos dia e studiantenan lo haña durante un BAN TOPA informashon di diferente organisashon di UNA. Djarason e studiantenan lo fèrf Museo nos Tula na Lanthùis Knip. Despues e studiantenan lo sali pa Lagun kaminda e resto di e programa lo tuma lugá i ku lo terminá djasabra. E pòtrètnan ta duna un bista di e ambiente di e promé dia di introdukshon.