AMSTERDAM/ WILLEMSTAD - Na Ulanda nan ta kontemplando uso di un tipo di plachi di number di un material sintétiko, ku ora bo skruf pa lòs e plachi, esaki ta kibra. Segun e funshonario polisial enkargá ku polis di tráfiko Koos Spee, esaki ta parse di bira e forma pa bringa hòrtamentu di plachi di number.
Na Ulanda hòrtamentu di plachi di number ta un problema, pasobra e ladron ta hòrta e plachi, pa despues hòrta kombustibel na pòmp di gasolin.
Segun e organisashon BOVAG, hòrtamentu di kombustibel ta sosodé entre 35 pa 40 mil biaha pa aña na Ulanda.
Un terser parti di e ladronnan di kombustibel aki ta kore ku plachi number hòrtá, loke ta pone ku pa e doño di pòmp ta bira masha difísil pa haña su sèn bèk.
Segun Spee, a introdusí e sistema di plachi sintétiko aki na Gran Bretaña ku hopi éksito.
Ministerio di Verkeer en Waterstaat na Ulanda ta studiando awor e posibilidat pa introdusí plachi di number di material sintétiko den henter Ulanda.
E idea aki ta parse un bon idea tambe pa Kòrsou, kaminda no solamente plachi di number, pero prinsipalmente e plachinan di kòntròl ta un opheto masha gustá pa ladronnan.
Hopi biaha, ora no por kita e plachi di kòntròl bai kuné, ta kita henter e plachi number pa sea usa e plachi number kompleto òf usa e plachi di kòntròl so.
Di otro banda mester apuntá, ku e sistema ku ta trahando riba dje awor aki pa implementá, esta e sistema di registro kompleto, for di ora un vehíkulo drenta Kòrsou te na momentu ku e no ta sirbi mas pa kore riba kaya, lo nifiká un kòntròl muchu mas stringente ku ta hasi e tipo di práktikanan aki virtualmente imposibel.