WILLEMSTAD - No ta pòrnada, nos a disidí di apelá e sentensia den kaso di rekonosimentu di e pareha homoseksual. Nos ke sa eksaktamente, kiko ta nos derechinan den Reino, kiko nos mes por atendé i kiko nos no por, asina minister di Enseñansa Omayra Leeflang a bisa, reakshonando riba entre otro komentarionan di su kolega minister ulandes Ronald Plasterk.
Minister di Enseñansa Ronald Plasterk ta konfia den hustisia. Mi tin tur konfiansa den korte di apelashon, ora e kaso bai dilanti, asina Plasterk a bisa, relashoná ku e desishon di gobièrnu antiano (lesa: minister Omayra Leeflang) pa apelá e sentensia ku mester sigurá un pareha homoseksual na Bureau Ziektekostenvoorzieningen, BZV.
E asuntu aki ketu bai ta tópiko di atenshon i diskushon den komunidat, tantu aki na Antia komo tambe na Ulanda mes.
Minister Plasterk a bisa ku no mester lubidá ku Statüt ta ofresé garantia tambe riba e tereno aki.
Artíkulo 40 ta bisa bon kla, ku tur derechi atkerí den un parti di Reino, mester konta pa otro partinan di Reino tambe. Den e kaso aki, un matrimonio ku a sera na Ulanda, ta konta igual na tur otro parti di Reino, o sea ku e ta konta tambe pa Antia.
Segun Plasterk, e tin tur konfiansa den hustisia, ora e kaso aparesé atrobe den korte próksimamente. E konosido abogado mr. Gerard Spong, den un komentario ku ta mustra poko rèspèt pa nos mandatario antiano a bisa tekstualmente ku “e minister ta papia manera un galiña sin kabes”, indikando ku supuestamente e minister ta papia manera lora.
Minister Leeflang sinembargo a keda al kaso i ta mira e asuntu aki ku kabes friu. Nos tin un realidat di atendé, el a bisa.
Segun minister Leeflang, ta masha importante pa sa te kon leu Antia por atendé su mes asuntunan den forma independiente i te kon leu e ta mará na Reino den esaki.
“E ta importante pa nos sa, pasobra tin otro temanan ku tambe tin konsekuensianan ku ta bai hopi leu. Mi ta bolbe menshoná e asuntu di kasamentu ku mas ku un persona. Tin e ehèmpel di aborto. Ta kosnan fundamental ku nos ta kere ku ta na su lugá pa nos haña klaridat riba dje. Ami ta sugerí tur esnan ku ta duna komentario pa laga nos sinta trankil warda kiko korte lo bai disidí den e kaso aki,” asina e minister a bisa finalmente.