WILLEMSTAD - Ami no tin mas tempu di dediká na e asuntu aki. Mi ke keda konsentrá riba desaroyonan positivo pa pais, asina promé minister di Antia Emily de Jongh-Elhage a bisa, komo reakshon riba e kaso kaminda a krea duda riba funshonamentu di Raad van Advies.
Lider di Partido Demokrat a kousa hopi konmoshon, na momentu ku el a anunsiá ku e ta disponé di informashon ku Raad van Advies promé a traha un konseho negativo riba institushon di un Kolegio pa Supervishon Finansiero pa Antia, Kòrsou i St. Maarten i ku despues a kambia esaki, riba preshon di gobièrnu antiano.
George ademas ta insistí ku e posishon di un dje miembronan di Raad van Advies, profèsòr Frank Kunneman ta kuestionabel. E figura aki tin diferente pèchi. E ta traha pa gobièrnu, pa diferente kompania di gobièrnu kaminda klaramente por konstatá konflikto di interes, segun George, ku ta haña ku pa e motibu ei mes, e no por okupá e funshon den e kolegio ku ta asesorá gobièrnu.
E deklarashon aki a okashoná hopi spekulashon den komunidat, si esaki ta basa riba bèrdat òf no.
Norbert George mes a duna gobièrnu inisialmente un siman di tempu pa sali prueba ku loke el a bisa no ta bèrdat, sino e ta presentá e dokumentonan korespondiente.
Gobièrnu na su turno a reta George pa no warda un siman largu, pero presentá e pruebanan ku e ta bisa ku e tin, mesora.
E tema aki a keda den un ambiente di ken finalmente ta papia bèrdat.
Te awe sinembargo George, kende a insistí ku e tin e dokumentonan ku ta konfirmá su akusashon, no a presentá nada públikamente.
Gobièrnu Sentral, pa medio di promé minister di Antia ta insistí ku nunka a eksistí un promé konseho negativo, ni den forma di un konsepto, te pa gobièrnu a eksigí pa kambia esaki den un nota positivo.
Otro desaroyonan ku a surgi den komunidat a menasá di tapa e asuntu aki. Norbert George sinembargo ta keda insistí riba su ponensha. George a anunsiá ku asina resès kaba, e lo pidi un reunion públiko di Konseho Insular pa diskutí un ke otro. Di otro banda, partidonan di koalishon tambe a bisa ku nan ke klaridat den e asuntu aki i ku nan tambe lo pidi un reunion públiko.
Promé minister di Antia, puntrá pa un opinion sinembargo ta keda para ‘riba ku no tabatin un promé konseho.
“Mi ta bolbe bisa, si Norbert George tin prueba ku ta otro, lag’é presentá e pruebanan. Ami no tin tempu pa dediká na e asuntu aki. Mi ke sigui keda konsentrá riba loke ta importante, loke ta importante pa progreso di nos pais. Esei ta importante pa ami. Nada otro,” asina e promé minister a añadí.