WILLEMSTAD – E Maestro Internashonal Luis Bernal Moro di Spaña a sòru pa un sorpresa dor di gana 7 punto for di 9 wega. E no a sabi di pèrdè kontra di niun Gran Maestro i a drenta e último buèlta ku un punto di delantero riba e sobra ahedresistanan. E tabatin sufisiente na un remise, empate, pa bai ku e título.
Den su último partido kontra di e Maestro Internashonal ulandes Thomas Willemze, mesora el a buska un remise, pero no a logra esaki i a bin kai derota dor di Willemze.
Ku esaki el a bin keda empatá ku e Gran Maestro Larry Christiansen di Merka i e otro Gran Maestro Joel Benjamin di Merka, ku mes tantu punto.
Larry Christinasen a bin sali na e promé lugá dor di un mihó promedio di skor i Luis Bernal Moro, mester a konformá su mes ku e di dos puesto. Na e di tres puesto a keda Joel Benjamin. Ku e puesto aki Benjamin a bin haña e promé di tres normanan ku e tin mester. E premio pa e mihó ahedresista lokal a bai pa Fabio Mensing ku 5 punto i mei na e di 11 lugá. Miéntras ku Jimmy Izijk tabatin e mesun kantidat di punto i a bin haña e premio di e hungadó mas haltu ku tabata “unrated”.
Seidi Salim-Moussa a bin haña e premio di e mihó hungadó femenino lokal.
Anna Zatonskih di Merka a bin haña e premio di e mihó hungadó femenino.
Jasel Lopez di Aruba ku e aña aki a debutá den e klase Habri, despues ku aña pasá el a hunga den Hubenil, a tèrminá ku 5 punto.
Den e Grupo Hubenil, tabatin tres kategoria.
E úniko ahedresista hubenil di Aruba, Junior Carrero a bin sali na promé lugá invikto ku 8 punto i mei den e Grupo 12 te ku 20 aña.
E ahedresista lokal Kiran Kanhai a tèrminá na di dos lugá ku 6 punto i mei, sigui pa Clefford Felipa na e di tres lugá ku 6 punto.
Den e Grupo di 10 pa 12 aña Shreesh Nayak a sali na promé lugá ku 5 punto, sigui pa Daniel Kanhai ku 4 punto i mei.
Den e Grupo di 6 pa 9 aña Poulo Meijer a tèrminá na promé lugá ku 4 punto i mei sigui pa Dylan Mathilda na di dos lugá i Curran Hodgson na e di tres lugá.