WILLEMSTAD – Riba e wepsait di IAAF, e Federashon Internashonal di Atletismo, a sali un artíkulo di sinku velosista ku por sorprendé e tres grandinan ku ta Usain Bolt, Tyson Gay i Asafa Powell ku nan ta yama “The Forgotten Five”.
Den e grupo “The Forgotten Five” aki tin Churandy Martina tambe.
Nan a tene un entrevista ku tur e sinku atletanan aki ku ta Derrick Atkins di Barbados, Churandy Martina di Antia ulandes e duo di Trinidad & Tobago, Richard Thompson i Marc Burns i Francis Obikwelu di Portugal.
Aña pasá durante di e Kampionato Mundial na Osaka, Hapon Churandy Martina tambe a hunga un ròl den e 100m final. Na e okashon ei el a yega na e di sinku puesto.
Awor aki e atleta yu di Kòrsou di 24 aña ta un aña mas bieu, mas sabí i mas velos.
“Semper mi ta mira kosnan masha positivo. Na e salida nos tur ta humano, Gay, Bolt i Powell. Nan tur ta ser humano meskos ku tur otro hende i mi ta sinti mi mes kapas di gana un medaya meskos ku tur otro”, asina Martina ta bisa.
“Mi kier gana un medaya e aña aki na e Weganan olímpiko di Beijing. Mi kier yega mas haltu riba e lista di e atletanan mas velos na mundu. Mi meta ta pa kibra e rèkòrt mundial. Mi sa ku mi por yega tur esaki pa motibu ku awendia mi ta pará pega ku e gran atletanan ei ku mi sa atmirá. Nan no ta e héroenan intokabel mas. Nan ta atletanan meskos ku mi ku ta kompetiendo ku otro pa mira kual di nos ta esun mas velos”.
Martina ta buskando di bira e di dos kompetidor di su pais pa subi riba un podium olímpiko despues ku jan Boersma un 20 aña pasá a gana medaya di plata den Windsurfing.
Un medaya lo garantisá un smail grandi riba kara di Martina, apesar ku kasi nunka su kara no ta serio. Si e smail tur hende no por keda sin nota e djente di oro ku e tin e lèter “C” ariba.
“Mi a pone e djente aki na 2003 despues ku mi a gana e título riba 100m na Pan Amerikano Hubenil. E lèter “C” riba mi djente ta pa Churandy, pa Curaçao i pa “Champion”, asina Martina a bisa ku su smail riba su kara.