WILLEMSTAD – “No mester wak hende den e kaso aki. Laga nos wak i konsentrá riba futuro di e kompania Curaçaose Dokmaatschappij, CDM pasobra e ora ei nos ta haña un solushon”, asina diputado Eugène Rhuggenaath a bisa, na bispu di e reunion krusial pa nombra un direktor nobo pa e kompania.
Djabièrnè awor tin e reunion krusial pa tuma desishon riba un direktor nobo pa e kompania. Diputado Eugène Rhuggenaath a enfatisá ku su punto di bista a keda mesun kos.
Diputado Rhuggenaath no ta di akuerdo ku e kandidato ku awor aki ta riba mesa pa bira direktor di Curaçaose Dokmaatschappij.
Rhuggenaath, a pone un posishon skèrpi, esta ku e kandidato mas fuerte te ku awor Franklin “Chebu” Sluis, no ta aseptabel p’e debí na su pasado ku ta manchá ku un kondena di korte pa aktonan froudulento ku el a kometé.
Banda di esei, Rhuggenaath ta haña ku e kandidato aki no ta disponé di e konosementu nesesario di mundu naviero.
Rhuggenaath a ripití e posishon aki na diferente okashon den pasado i ketu bai ta para riba su punto ku e ta konsiderá un punto di prinsipio.
Rhuggenaath mes a lansa un proposishon pa sali for di e impase aki. El a proponé pa nombra un direktor interino ku e tarea spesífiko pa trese e kambionan nesesario den e kompania i pone e empresa aki riba e kaminda di progreso i kresementu atrobe. E direktor interino aki lo mester keda pa un tempu definí, despues di kua ta nombra un direktor definitivo.
“E direktor nobo mester ta un hòmber intachabel, mirando e tarea importante ku e mester ehekutá den e kompania.
Nos ta kere ku e direktor nobo mester bira un loke nos ta yama ‘turnaround manager’, un persona ku mester bòltu e timon na e empresa i hasi esaki un empresa finansieramente saludabel atrobe,” asina Rhuggenaath a bisa.
El a mustra, ku e direktor nobo mester bin ku loke por yama un plan di reskate pa e empresa, pa hasi esaki un empresa kompetitivo atrobe.
Pa logra esei, mester kuminsá ku hasi e kompania finansieramente sano, esta ku e kantidat di trabou ku e ta hasiendo awor aki, en bèrdat ta nifiká tambe dividendo pa e propio kompania.
Manera ta konosí, CDM tin masha hopi trabou pa basta tempu kaba, pero pa un òf otro motibu, no ta ganando plaka manera tur hende lo a spera.
“Pa bo hasi e kompania finansieramente sano, bo mester por gosa di pleno konfiansa por ehèmpel di mundu finansiero, di bankonan. Bo no por ta un persona riba kua tin mancha, tin duda,“ Rhuggenaath a bisa.
El a bisa finalmente ku importante ta pa keda enfoká riba e meta prinsipal, esta di desaroyá Kòrsou di tal forma ku e ta bai hunga un papel importante den ekonomia mundial.
“Mi ta kere ku a yega tempu pa nos stòp di wak persona, stòp di wak hende i wak futuro di e astiero,” diputado Rhuggenaath a bisa.
Manera LA PRENSA a informá siman pasá kaba, e diputado a bisa, ku e no tin plan di kibra ku su partido. E hecho ku el a anunsiá ku e no por biba ku nombramentu di Sluis, a lanta un kantidat di spekulashon, pero e mandatario a desmentí esakinan.
“Mi por trankilisá tur hende, ku mi no tin ningun, pero ningun intenshon di bandoná e partido aki, anto sigur no pa bai lanta mi mes partido.
Mi meta ta pa sigui traha na bienestar d Kòrsou,” asina Rhuggenaath a afirmá.