WILLEMSTAD - “Ami a kere semper ku e aktual gobièrnu, partikularmente un partido ku semper ta pretendé di ke kaba ku kosnan tradishonal ku no ta kumbiní e pais aki, lo no praktiká loke nos konosé komo nepotismo mas. Pero mi mester konstatá, ku nepotismo ta mas grandi ku nunka den kompanianan di gobièrnu,” asina Gregory Damoen a bisa, relashoná ku e desaroyonan na Curoil.
Partidonan di oposishon a pidi un reunion públiko riba desaroyonan na e kompania Curoil. Esnan ku a firma e petishon ta Forsa Kòrsou, MAN i Niun Paso Atras.
Ta konosí, ku Konseho Insular di Kòrsou, ketu bai ta ku resès, pues no ta muchu kla ainda si gezaghèber lo konsiderá e asuntu aki di tal importansia, ku e ta dispuesto pa kibra resès i konvoká un reunion tòg.
Gregory Damoen a bisa, ku loke a sosodé na Curoil, kaminda tabatin negoshi den negoshi, ta simplemente inaseptabel.
“Pero tin un faktor mas importante ainda: nos no sa si loke a sosodé, no tabatin influensia riba e preis haltu ku pueblo ta paga aki ‘fo pa energia. Ta bale la pena analisá esaki i p’esei nos tambe ta boga pa un investigashon profundo,” asina ela bisa.
Damoen a mustra, ku e ke bai un paso mas leu: nos ta na fabor pa hasi un investigashon den tur kompania di gobièrnu, no solamente e kompania Curoil, el a bisa.
Pa Damoen, ta inkreibel tuma nota kiko ta pasando na e kompania. “Awor nos a bin tuma nota, ku a nombra miembronan di famia den e kompania i den Hunta di Komisario. Nos ta haña nos ku un diputado ku ta rekonosé abiertamente ku ta su famia el a hinka den e kompania. Nan ta biaha den ambiente di luho, nan ta keda na e hotèlnan di mas karu i sofistiká ku tin, anto pueblo ta sigui sufri. Ta esaki ta e ehèmpel di nepotismo di mas grandi ku nos por a konosé,” segun Damoen.
Damoen ku ta miembro di frakshon di Forsa Kòrsou den Konseho Insular a bisa mas aleu, ku su speransa ta pa e reunion públiko produsí e kontestanan ku ainda falta riba e kantidat grandi di pregunta ku tin, kiko realmente a sosodé na Curoil.
“Bo ta tende un kantidat di kos. Kosnan ku ta lòs for di loke a bin dilanti te ku awor. Anto nos ke sa presisamente ta kiko ta pasando ku un di e kompania di mas importante di nos pais,” segun Damoen.