WILLEMSTAD - E aña aki tabata masha difísil pa konvensé yunan di tera maestro di skol ku ta biba na Ulanda, pa bin traha na Kòrsou. E motibu ta masha simpel: algun luna pasá, minister di Enseñansa di Ulanda a bai di akuerdo ku sindikatonan den enseñansa pa oumentá sueldo di e maestro di skol ku un suma supstansial.
E oumento aki a bira un hecho despues di negosiashonnan basta pisá ku a bai kaba te den oranan di mardugá algun luna pasá. Minister di Enseñansa a bisa na e okashon ei, ku e ta primintí e oumento aki, pa asina garantisá un mihó desaroyo di enseñansa. E sindikato di maestronan di skol sinembargo a bisa, ku nan ta kontentu, pero ku ainda no a yega kaminda mester a yega.
Kompará ku Kòrsou e oumento sinembargo ta keda un oumento grandi.
E salario di un maestro di skol ta asina atraktivo, ku ni maske e sirkunstansianan di trabou ta ménos faborabel na Ulanda ku aki na Antia, hopi maestro ta preferá di keda traha na Ulanda tòg.
Lisette van Lamoen-Garmers, a konfirmá ku Direktiva di Skol Katóliko a sinti efekto di esaki tambe durante e intento resien pa rekrutá maestro na Ulanda.
“Si normalmente nos sa haña manera un 20 maestro, e biaha aki nos no a yega mas leu ku un 15 asina,” ta loke el a bisa.
Sidney Justiana a bisa, ku di akuerdo ku e informashon ku e ta disponé di dje, e situashon no ta asina grave, en todo kaso no manera nos a konosé algun aña pasá.
El a bisa, ku loke si el a komprondé ta, ku na skolnan avansá, tin skarsedat, pasobra e maestronan pa skol avansá ta preferá di sigui traha na Ulanda, mirando e oumento di salario ku a kaba di drenta na vigor.
“Aki ta papia di un oumento di 500 euro, ku tradusí na plaka antiano ta entre 1200 pa 1500 florin. Mi por komprondé ku un maestro ta bisa, ku no ta kumbiniente pa e bin traha na Kòrsou. Anto mi ta kere, ku esaki ta bira un dje dolónan di kabes pa e próksimo añanan. Bo no ta bai haña, ni antiano, ni ulandes ku ta dispuesto pa bin traha pa e salario ku nos por ofresé aki. Awor, si e ulandes no ke bin ta di ménos importansia, pero lo ta duele si nos no por haña nos yunan di tera bini bèk bin traha serka nos,” segun Justiana.
Justiana no ta kere di otro banda, ku maestronan djaki lo muda pa Ulanda. Aki e sistema ku Ulanda ta eduká mucha ta bin hunga un ròl. E manera ku nos ta atendé ku nos hubentut ta mas rígido, anto e maestro yu di Kòrsou ta preferá aki tòg, segun e presidente di SITEK.