AMSTELVEEN/ WILLEMSTAD - E kompania KLM-Air France a weta su ganashi baha ku mas ku 50 porshento den e promé kuartal di aña 2008. E motibu prinsipal pa e desaroyo negativo aki ta e hecho ku preis di kombustibel a subi barbaramente komo konsekuensia di oumento di preis di petroli riba merkado mundial.
Esei ta loke e kompania a anunsiá ayera.
Hustamente pa e motibunan ekonómiko aki, KLM-Air France a tuma e desishon pa redusí gastu ku no ménos ku 190 mion euro.
Ku esaki, e redukshon di gastu total pa aña fiskal 2008/2009 lo yega e montante di 620 mion euro. Den e proseso di redukshon di gastu, e kompania lo bai evaluá su rutanan, pa determiná kua ta sufisiente lukrativo pa e mantené i kua no. No ta kontemplando, a lo ménos ainda, pa mishi ku e servisio ku KLM-Air France ta duna. Di tur manera, no ta parse ku e pakete di medida ku e ta bai tuma, lo afektá buelonan pa Kòrsou.
E ganashi nèto ku e kompania a hasi ta di 168 mion euro, ku ta hopi ménos ku e 415 mion euro ku el a hasi den e promé kuartal di aña pasá.
Ta bon pa bisa tambe, ku den e último kuartal di 2007, e kompania a sufri un pèrdida. Pa loke ta volúmen di benta, mester bisa ku KLM-Air France den e promé kuartal di e aña aki a logra un márgen mas grandi pa un total di 6.3 mil mion euro.
O sea, ku no opstante stankamentu den ekonomia rònt mundu i no opstante ku preis di pasashi a bira mas karu pa asina purba kompensá oumento di kombustibel, KLM-Air France a transportá mas tantu pasahero.
Den e kuartal ku ta tras di lomba, KLM-Air France a gasta 1,36 mil mion euro na kombustibel, ku ta un oumento di kasi 25 porshento. Esaki naturalmente tin di aber ku oumento di preis di petroli riba merkado mundial. E kompania ta kalkulá ku den henter e aña fiskal ku ta koriendo aki, e lo gasta 5,86 mil mion euro na kombustibel.
Pero no opstante tur kos, e kompania ta kere ku den e aña fiskal aki e lo realisá un ganashi di 1 mil mion euro. E intenshon di e kompania ta pa oumentá su kapasidat e aña aki ku 2 porshento.