WILLEMSTAD/ ROERMOND – Un grupo di 20 habitante a entregá un petishon na nan alkalde pa saka un pedofil for di nan bario. En total 100 habitante di e bario Planetenbuurt na Roermond a firma e petishon. No mas ku ayera Louise Reed di Kinderbescherming a deklará, ku e problema akí ta kresiendo na Kòrsou tambe.
E habitantenan na Roermond a disidí na entregá e petishon na nan alkalde, despues ku nan a sinti ku polis a laga nan na kaya. Nan a reklamá ku e polis di bario no tabatin tempu pa nan, ora nan kier a papia di e sospechoso di 44 aña. Segun Ministerio Públiko tin 5 keho entregá kontra e hòmber, relashoná ku abuso seksual ku muchanan hòmber menor di edat. Entretantu e hòmber ta detené. E tabata biba na Gelderland i ora kos a kuminsá bira kayente p’e, el a muda i bai biba na Roermond kaminda el a haña un kas di hür di gobièrnu. Tin papiá ku su ruman hòmber ku ta traha na e instansia ku ta regla bibienda, lo a sòru pa e haña un kas.
No mas ku ayera Louise Reed di Kinderbescherming a bati alarma. Reed a deklará, ku e problema di pedofil ta birando grandi na Kòrsou. Un pedofil ta un adulto ku ta gusta mucha. Den práktika hopi bia ta resultá ku ta trata di hende hòmber adulto ku ta gusta muchanan hòmber. Reed a splika ku nos tin un problema grandi na Kòrsou ku nos hòmbernan. “Ta trata di hòmbernan ku ta abusá seksualmente di muchanan hòmber. Un di e kasonan akí a resultá den asesinato di e hòmber ku tabata abusá”, Reed a bisa. Mas aleu el a bisa ku na Kòrsou nos tin ku atendé na un manera serio ku e problema akí. Último tempu tabatin diferente kaso kaminda hende hòmber a abusá seksualmente di muchanan hòmber.