WILLEMSTAD/ ROTTERDAM – Ladronnan ku ta kibra outo i hòrta kosnan di balor, por spera un ofensivo pisá di parti di polis i kompanianan di seguro. E kantidat di kiebronan ta asina haltu, ku hustisia a disidí ku no por sigui soportá e molèster.
Un di e malechornan grandi, Charlie, a konta ku tur outo por habri sin yabi i p’esei ta asina fásil pa hòrta for di un vehíkulo. Entretantu polis a introdusí algun asina yamá ‘lokauto’s’, ku ta kargá ku kámara ku ta manda imágennan live direktamente pa polisnan ku ta den besindario ta opservá. Asina e malechor drenta den e vehíkulo e polisnan ta drenta akshon.
E notorio Charlie a splika e polisnan, ku e mester di 10 minüt i un skrufdrai i e ta habri tur e vehíkulonan stashoná den kurá di e warda di polis kaminda nan tabatin’é detené. Charlie a splika, ku e por habri tur outo sin yabi. Tin bia ora e kaba di hòrta for di un outo, e tabata asta sera e outo bèk na lòk. “Ku un skrufdrai mi ta den un outo mas lihé ku un doño ku tin e yabi. Pa habri un Mercedes ta un tiki mas fèrfelu. E modèlnan nobo di Toyota tambe ta dura un tiki mas ku promedio pa habri nan. Pero Opel, Renault i Volkswagen mi ta habri den un fregá di wowo.”
E akshon di polis di Rotterdam ta fungi komo proyekto piloto pa otro siudatnan ku tambe tin hopi molèster ku ladronisia for di vehíkulo.