WILLEMSTAD – Diputado di Asuntunan Ekonómiko i di Turismo, Eugène Rhuggenaath a anunsiá, ku na novèmber awor e lo presentá loke el a yama un Vishon Ekonómiko pa e periodo 2009-2026 pa Kòrsou. E bishita ku el a hasi resientemente na Ulanda den kompania di un tim di eksperto tabata hustamente pa atendé diferente elemento di e plan aki. Na Ulanda entre otro tabatin un enkuentro ku minister pa Asuntunan Ekonómiko Maria van der Hoeven. E intenshon ta pa diskutí e vishon aki ku tur gremio den nos komunidat ku e ophetivo pa yega na un vishon definitivo, bon studiá i ankrá den nos komunidat pa garantisá un mihó bienestar pa nos futuro, asina e diputado a informá despues di su bishita na Ulanda.
E meta di e bishita na Ulanda den yüli último tabata pa ampliá, kompartí i generá informashon valioso pa ku e vishon ekonómiko nobo pa transformá Kòrsou den un Siudat Portal Ulandes Karibense, “Dutch Caribbean Portal City (DCPC)”, maksimalisando e desaroyonan posibel den e diferente sektornan (tradishonal/nobo) ku tin e potensial pa realisá esei. No opstante ku e vishon ekonómiko nobo ta pa largu plaso, a tene debido kuenta ku e inisiativa soshal ekonómiko (SEI) pa asina optené un sinkronisashon den e dos manehonan aki. Den e kuadro aki tambe mester yega na un koperashon ku Ulanda ku e enfoke pa sigui kultivá e sektornan tradishonal, pero tambe pa desaroyá e sektornan nobo/moderno i asina realisá un Desaroyo Ekonómiko Duradero (“Duurzame Economische Ontwikkeling – DEO”). E koperashon ku Ulanda por konsistí di interkambio di e.o. ekspertonan, konosementu i eksperensia di instansianan establesé na Ulanda, aunke ku ta nos propio ekspertonan tin ku formulá tantu e vishon komo e maneho pa garantisá e desaroyo ariba menshoná, asina e diputado a bisa.
E diputado a bisa, ku e mishon na Ulanda tabata di gran balor pa desaroyo di e Vishon Ekonómiko. Aparte ku e resepshon tabata total a keda palabrá ku e diferente ministerionan ku nan lo asistí Kòrsou ku dato i sosten basá riba nos petishon. “Ya na nos regreso Servisio pa Asuntunan Ekonómiko a risibí diferente nota di maneho i vishonnan ulandes riba diferente tereno ekonómiko”, asina e diputado a sigui bisa.
Palabrashonnan ku a hasi ku diferente Ministerionan i instansianan ta entre otro pa sosten tékniko pa hasi estudionan konhuntamente riba e diferente áreanan di maneho i pa interkambio di informashon (dato) i dunamentu di sosten na e proseso. Tambe a yega na un akuerdo ku diferente instansianan pa estrechá e kontaktonan ku Departamentu di Asuntunan Ekonómiko. Esaki a resultá ya kaba den un bishita di e promé invershonista di e kompania Eco Point pa establesé su mes na Kòrsou. A papia riba e posibilidat pa “stage “di ámtenar lokal na diferente ministerio i instansia ulandes. A korto plaso Konseho Insular i Bestuurscollege lo risibí un relato por eskrito di e bishita aki, den kua lo elaborá mas detayadamente riba e meta i e resultado di e bishita. Tambe lo por spera un plan di akshon integral pa yega na e vishon ekonómiko, e maneho ekonómiko duradero di 2009 pa 2026 i e promé plan di maneho di 4 aña di 2009 te ku 2012. Durante di e proseso pa formulá e vishon lo bai tin diferente sekshonnan ku stakeholders i gruponan di ekspertonan i interes pa krea un base di aseptashon i sosten amplio. Tambe lo bai tin mas interkambio di ámtenar lokal, ulandes i instansianan ulandes. E vishon ekonómiko di diputado Rhuggenaath lo wòrdu presentá durante di e seminario ekonómiko na novèmber 2008. Lo trata na tin e plan di maneho di 4 aña ( 2009-2012) kla na mei 2009 i implementashon di e promé akshonnan lo ta na yüli 2009. Un punto di atenshon di sumo importansia pa sigurá e éksito di e vishon ekonómiko aki ta pa na momentu di konkretisá i ehekutá e vishon, tin un bon sinkronisashon i timing, asina e diputado a bisa.