Dr. Lorito ta yama tur hende un felis dia. Awe ta djarason i Lorito ta preparando tur e lorititonan pa bai skol mañan. Ta masha pluma nobo mester a kumpra. Tas ku masha dibuho, jeans ku saku tur kaminda, pèn, pòtlot, skrift, buki a kosta Lorito un dineral. Lorito tin masha duele di e mayornan. Bo por kere ku e mesun jeans ku tabata kosta 29 florin, awor ta kosta 109 florin? Nos a tende masha di kolchon sosial, mas kòntròl i otro asuntu, pero nos ta kere mas bien ku tabata anunsionan pa tene nos kontentu.
*********
Bo por kere ku DEZ no a duna Fundashon pa Konsumidó informashon na ora, pa por tene konsumidónan na altura di un ke otro. P’esei e aña aki niun hende no a haña rekomendashon unda ta mas barata pa kumpra. Ta kon kosnan t’asina. Hustamente den un tempu kaminda mester tin mas kordinashon, e tipo di kosnan aki ta laga hopi di deseá. Anto ken ta kòrda riba nos?
*********
Diputado ta ku fakansi, pasobra el a bisa, ku masha tempu e no a tuma liber. Awor nos ta puntra no: di kon e mester a bai Ulanda anto? No tabata nesesario pa bai Ulanda si tabatin asina tantu funshonario i direktor a kompañá e studiantenan. Nos ta lamentá un poko, ku pa promé bes den último 30 añanan, e diputado di Enseñansa no ta presente ora skol habri! Lorito di lebumai nos!
*********
Nos a tende ku awe mainta tabatin karavana pa un hende ku a sali di prizòn. Nos ke sa un kos no: awor a bira ta tene karavana tambe pa hende ku tabatin kontakto ku hustisia? Tin sierto kosnan ku na Kòrsou realmente ta mundu riba su kabes. E mihó kos ta pa bai kas ketu ketu, bin bèk trahando duru den komunidat i despues presentá bo mes komo un hende ku nos por respetá atrobe! Ban wak kua korant ta pone e kos aki riba frontpage djis pa romantisá hasimentu di malu. Lo tuma nos na malu, pero nos tin ku señalá e kos aki. Simplemente e no ta bon!
*********
Nos a ripará, ku direpente kosnan a bolbe kuminsá bira kayente. Basta hende tabata ku fakansi ku a laga nos trankil pa algun dia, pero awor ku nan ta bèk, ya kaba kosnan a bolbe kuminsá bai den un direkshon, ku nos no ta deseá. Nos a spera ku nan lo a bin bèk, ku mente fresku i pa wak kon nos ta bai uni i dialogá mas tantu. Ta parse sinembargo, ku nan a bai hasi nan kuchúnan mas skèrpi na fakansi. Nos tin nan dor! Si ta nesesario nos lo desenmaskará nan tambe!
*********

(foto rodion)

Un pabien awe pa Rodion Davelaar. Ya kaba e tin shampaña den man pa selebrá 18 aña ku el a kumpli awe. Rodion ta forma parti di e grupo di tres deportista individual yu di tera, ku a bai defendé nos honornan na Beijing. Pabien, tur kos bon i nos ta spera ku Beijing lo ta un masha bon eksperensia. Ora bo bin bèk, nos ta bin tuma nos bolo, pasobra nos a komprondé ku mama Lydia ta traha bolo masha dushi mes!
*********
Nos ta bai keda te aki awe. E dia di awe a pone nos na kareda un poko, pero no tin nada ku ta hasi nos mas felis ku un reto. Kada reto ku nos vense ta trese mas alegria pa nos. Te mañan ku Dios su poder i kòrda riba tráfiko, pasobra skol ta bai kuminsá mañan.