WILLEMSTAD – E siman aki direktiva di Omega College lo bishitá edifisio di Scherpenheuvel komo alternativa pa úbika e skol aki den e edifisio menshoná. LA PRENSA for di fuentenan a komprondé, ku Omega College ku tabata buska un edifisio nobo, ku tin bista riba edifisio di Scherpenheuvel ku ta den un bon estado pa e skol su operashon. Omega College ku ta situá den edifisio bieu di Asuntunan di Labor, ya no por sigui, debí na e kondishon di edifisio aki. E edifisio aki ta pasa awa i tin vários parti ku mester keda restourá, motibu ku ta bira imposibel pa sigui den e kondishon aki.
Siman pasá un invitashon a bai na Omega College pa pasa mira edifisio di Scherpenheuvel ku ta den un bon estado, komo alternativa ku nan por skohe. E siman aki un komishon formá pa direktiva i komishon di mayornan lo bishitá edifisio Scherpenheuvel, pa mira si e fasilidat aki por kumpli ku e eksigensianan ku mester pa funshonamentu di Omega College. No tin duda, despues di tin un tempu ta buska sin por haña un edifisio adekuá, por spera ku Scherpenheuvel lo por resultá e edifisio pa Omega College.