DEN HAAG/WILLEMSTAD – Kuminsamentu di aña benidero mester kuminsá e lokèt pa keho riba kompanianan di aviashon i nan servisio na Schiphol, Ulanda. Biaheronan ku tin keho riba nan biahe lo por haña un rekompensa finansiero si nan keho ta hustifiká.
Retrasonan hopi largu, anulashon di buelo i bukmentu di muchu pasahero òf otro problema serio lo por keda atendé pa un komishon independiente ku ta bai atendé esakinan na e lokèt ofisial pa keho. Pa dia promé di òktober próksimo lo mester tin tur dato kla pa funshoná na kuminsamentu di aña benidero.
E informashon di e lokèt di keho ta bin den un tempu ku tin hopi preokupashon pa futuro di kompanianan di aviashon na Ulanda ku lo por impaktá komunikashon entre Kòrsou i Ulanda. Presidente di direktiva di KLM Peter Hartman a bisa awe ku e kompania Martinair no ta bayendo fayit riba un tèrmino kòrtiku. Segun e, a sit’é robes den un entrevista ku a keda publiká e siman aki na Ulanda. KLM ta negoshando pa wak si nan ta bai tuma Martinair. Aktualmente KLM ta pendiente di aprobashon di e Komishon Europeo pa esaki tuma lugá.
Martinair, meskos ku hopi otro kompania di aviashon, ta bou di preshon grandi di konsekuensia di oumento di preis di kombustibel, impuesto riba biahamentu i kontratempu ekonómiko. Pero sigur sigur no tin un menasa di bai fayit segun un bosero di e kompania.
Pero fayit òf nò, ta bai bini un kambio grandi den preis pa bula na Ulanda. E kompanianan Ryanair, Virgin Atlantic i Easyjet ku tabata ofresé preisnan masha abou mes pa biaha den Europa, ta bai para nan aktividatnan debí na oumento di preis di barí di zeta i e konsekuensia ku esaki tin pa kompanianan di aviashon.
Stephen Ridgeway ku ta doño di e kompania Virgin Atlantic a bisa ku e desaroyonan mundial ta bai para tur e fiestanan di soltero den otro pais i hendenan ku un di dos kas den un otro pais europeo lo no por bai un biaha pa luna mas pa keda den e kas ei.
Schiphol p.e. ta spera di haña e aña aki dos mion pasahero ménos ku aña pasá. Nan ta kulpa gobièrnu ulandes pa esaki bisando ku e impuesto di aeropuerto a keda introdusí sin pensa promé. Hopi ulandes ta biahando via di aeropuertonan djis pafó di frontera na Alemania i na Bèlgika, ku si no a oumentá impuesto di aeropuerto.