Skina di Sorti, awe djarason 6 di ougùstùs di 2008, ta kuminsá ku deseá tur hende un bon dia. Un empresa ku ta forma un parti esensial di e kadena di entrega di energia hamas i nunka por tin komo miembro di nan hunta di komisario hendenan ku no tin saber di un empresa komersial. No nesesariamente mester ta trata di saber di maneho. Konosementu di teknologia, merkadeo, maneho di rekurso humano, òf kalke otro aspekto di e baiben di bida komersial entre otro tambe ta duna indikashon di probabilidat di e espíritu ku por kontribuí na un proseso di direkshon (no konfundí esaki ku maneho diario) i kòntròl adekuado di un empresa vital manera por ehèmpel Curoil.
****
Un bista riba e lista di miembronan di e hunta di komisario di Curoil ta trese duda grandi riba e seriedat ku kual gobièrnu ta kere di atendé ku entidatnan importante pa pais. Ta un realidat ku tur partido polítiko (rònt mundu) ta rekompensa miembronan ku sierto mérito pa partido ku un puesto for di kual nan ta gana algu èkstra, tin sierto prestigio i otro sorto di benefishinan. Pero pa konsiderá miembresia den hunta di komisario di un Curoil komo tal no ta akseptabel.
****
Kredibilidat, e grado segun kual bo por aseptá ku algu ta basa riba bèrdat (“geloofwaardigheid”) i konfiansa (e grado den kual un tersera ta stèns riba bo,“vertrouwen”), ta elementonan ku un persona òf instansia ta influensiá ku, primeramente akshon koherente i konsistente. Falta di koherensia (e grado den kual e akshon por wòrdu splika for di e informashonnan relevante) i konsistensha (e manera ku un akshon ta korespondé ku previo akshon bou di mesun sorto di sirkunstansia), ta lanta interogatorio.
****
Tabatin koherensia den posishonamentu di gerensia di Curoil ante e polítika di preis di energia di gobièrnu di Kòrsou i e resultado finansiero ku nan a registrá. Ku rason Curoil a mustra riba e posishon irealista i insostenibel ku Bestuurscollegenan di turno (esun aktual i esun anterior) a mantené, pa lokual ta ahuste di preisnan di kombustibel lokal, na e desaroyonan global. Bestuurscollege a peka kontra dje regla ku ta bisa ku, realidat ekonómiko ta eksigí un desishon ekonómiko i no polítiko.
****
Bestuurscollege a tuma un posishon polítiko ku el a imponé riba e empresa Curoil sin ku hunta di komisario a tuma un posishon adekuado. No por tabata otro tampoko pasobra e hunta di komisario su konstelashon tabata tin demasiado hende ku e profil di “jabaas” polítiko ku por lo demas ta karesé di konosementu i espíritu komersial.
****
Ta na partido polítiko i eventualmente frakshonnan den kuerponan representativo pa posishoná netamente polítiko. Un kolegio ehekutivo sinembargo tin di mantené su mes na reglanan di gobernashon responsabel i den esei tin di sigui lokual funkshonalmente (kiko bo tin di hasi pa atendé ku e problema den kuadro dje disiplina ku e problema ta korespondé) ta rekerí.
****
Polítikamente e tendensia ta keda unu di skohe e kaminda di ménos resistensia, pues e kaminda di abestrus. Na kaminda ta sosodé lo inevitabel, esta ku mentenan malisioso ta probechá di e esfera di feksmentu di kos, i postura suak di direkshon di e empresa. Mal ehèmpel di gobernantenan pa chika for di e kompania ta haña su refleho denter di e empresa. Pues “de politiek” mes a krea un esfera malu den diferente dje empresanan vital di pais. Nan ta rondoná ku mal airu di intervenshon polítiko.
****
Mi a apuntá for di e momentu ku e asuntu di Vantage tabata hunga ku gerensia di Curoil a reakshoná emoshonalmente riba e relato di Vantage (despues di paga basta dollar, e kos a kaba na aros i koko) i ku nan a faya den ahustá nan operashon na e probabel konsekuensia dje desishon i falta di desishon di Bestuurscollege. Curoil mester a transmití e mensahe ku kos ta pèrta, pa medio di mas akshon en bes di palabra so. Mi a apuntá ku mester a kòrta (visiblemente) den diverso gastu i mustra disposishon (visibel) di sigui diferente dje rekomendashonnan di Vantage.
****
Por lo demas e reakshon di gerensia di Curoil riba Vantage tabata unu demasiado polítiko en bes di unu “zakelijk”. Meskos ku polítiko den gobernashon, gerensia di Curoil a opta pa “denial” en bes di aktua riba diferente asuntu ku korektamente Vantage a pone dede riba dje. No tin nada malu den aseptá ku kos por bai mihó i aktua riba rekomendashon. Tabata un oportunidat di oro pa gerente nobo usa e relato di Vantage komo punto di salida pa un reposishonamentu di Curoil.
****
Pa lokual ta gobièrnu a yega e momentu pa puntra si Curoil tin balor agregá si e ta keda sirbi komo un distribuidor pa Pedevesa. Ku e konosementu atkerí Curoil por sirbi komo instrumento pa yega na alternativanan mas mihó ku lokual Pedevesa ta entregando. Lokual a sosodé awor aki ta ku algun profeshonal denter di Curoil a utilisá e konosementu denter di Curoil pa benefisio propio. Nan a alargá e kadena di entrega innesesariamente (manera Curoil ta hasié kaba ku entrega di produkto di Pedevesa).
****
Un empresa di utilidat tin di aktua ku e realidat den mente, ku un di su prinsipal “stakeholders” ta e konsumidó. Finansiadó, akshonista i profeshonalnan tin e konosementu pa lesa i komprondé lokual tin tras dje resultado. E konsumidó su prinsipal informadó ta prensa, ku ta haña su informashon di gerensia. Ta bai bira sumamente difísil pa gerensia splika komunidat ku e ta efikas den e trabou di intermediario.
****
Mi ta bolbe trese bou di atenshon di dirigentenan di pais ku nos mester stòp ku bahamentu di lata pa hustifiká prestashon mediokre. Den un pais ku ke ta kompetitivo mas bien mester keda pone e lata mas haltu, pa por surpasá e retonan grandi ku futuro ta presentá ku éksito. Gerente di Curoil, Selikor, Aqualektra i otro empresanan estatal mester hasi esfuerso pa bòltu e paradigma di gobièrnu ku ta “trendsetter” pa sektor priva, den unu di kompania di utilidat ku ta “trendsetter” den un aserkamentu mas dinámiko i interaktivo.
****
Entidatnan di gobièrnu su gerensia i hunta di komisario mester tin bista riba futuro i ku e konsumidó komo un “target” importante den komunikashon, tantu ku palabra komo den akshon. Di gobièrnu mester bini akshon serio pa lokual ta nombramentu den hunta di komisario i komunikashon entre gerensia, hunta di komisario i gobièrnu. Reunionnan mester ta mihó notulá i e nótulonan mester wòrdu skrudiñá pa e kuerponan di kòntròl di moda ku periódikamente tin evaluashon di nan funshonamentu.
****
Ohalá ku maske ta un par di miembro di Konseho Insular hiba un debate riba esensia di lokual a sosode. Tin fayamentu di “de politiek”, gerensia i esnan ku tin di hiba e kontrol denter di e empresa. Si lider polítiko di NPA, Nelson Pierre tabata tin disiplina polítiko e lo por tabatin su “finest hour” den polítika.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.