WILLEMSTAD- Informashonnan verídiko ku LA PRENSA ta disponé di dje ta indiká, ku tin un grupo pro èks presidente di e sindikato di trahadónan di enseñansa ku intenshon serio pa tumba e aktual presidente di Sitek, Bicho Justiana. Basta dia kaba tin rumornan persistente ta sirkulá, ku e grupo pro-Cova ta buskando kabes di Justiana, un ke otro a haña su konfirmashon djabièrnè último, durante di un reunion general konvoká pa e sindikato. Durante e reunion akí a surgi un konfrontashon pisá entre Jackie Cras, pa hopi aña, kolaboradó estrecho di Errol Cova i un grupo grandi di miembro di e sindikato, ku a kondená e proseder di Cras.
Ta un echo ku for di dia ku Justiana a bandoná filanan di PLKP i a djòin e filanan di e partido MSL, a yega un fin abrupto na e relashon di hopi aña entre Justiana i Cova. Esaki a kondusí na vários akto di “gueria” kontra Justiana i su direktiva. Durante vários reunion di e sindikato tabatin miembronan ku ainda ta loyal na Cova, kendenan na un manera fuerte ta kuestioná funshonamentu i maneho di Justiana i su direktiva. Inkluso a lanta un grupo dirigí pa un dama, kende tin apénas tres aña miembro di e sindikato, kende ta konsiderá nan mes komo e plataforma pa remplasá e aktual direktiva. Sinembargo, pa hopi miembro di e sindikato, e plataforma akí ta nada mas ku un kapa pa e intento pa tumba Justiana i su direktiva.
Djabièrnè último e sindikato a konvoká un reunion ku e puntonan di agènda: Evaluashon aña sindikal 2007/2008 i preparashon pa elekshon di direktiva i kuerpo di konseho pa e sindikato. Remarkabel di e konvokatorio pa e reunion akí tabata e echo ku a pidi pa solamente miembronan di sindikato asistí i no manera tabata sosodé ántes, den tempu ku Errol Cova tabata presidente. Den e tempu ei tabata laga miembronan di otro sindikatonan afiliá na Kámara Sindikal yena sala i tuma desishonnan, entre otro pa drenta wèlga, basá riba aklamashon, esta mayoria di sala.
Dado momento durante e reunion, e (eks) kolaborador di Errol Cova, Jackie Cras a lanta i a hasi algun pregunta skèrpi na Justiana i su direktiva enkuanto legalidat di e reunion. Cras no a aseptá e echo ku Justiana a disidí pa someté su pregunta na sala, ku na hopi okashon a desaprobá intervenshon di Cras gritando “bu”.
Opservadornan ta kere ku e loke a sosodé djabièrnè último, ta e promé salvonan den un guera total ku lo bai surgi entre e dos kamponan. Di otro banda tin algun opservador ta kere ku Justiana lo probechá di e situashon aki i baha.
Durante un kombersashon ku LA PRENSA tabatin awe ku Justiana awe, relashoná ku un otro tópiko, Justiana a indiká di a tuma nota di insinuashon i rekargonan di Jaqueline Cras den medionan di komunikashon, pero ta tene su mes na loke ta e realidat di funshonamentu di Sitek. Inkluso Justiana ta mustra, ku tabatin bastante yamadanan ku a drenta, den kua ta puntra kiko ta e pasonan ku lo bai tuma, pero tur loke Sitek ta pidi pa tuma nota e dianan aki e manera ku kosnan lo bai bin dilanti.
LA PRENSA a trata na drenta den kontakto ku Errol Cova via di su selular pero esaki no a logra.