WILLEMSTASD – E mal tempu di awe mardugá a lanta e kandela ku a destruí Shop & Save djadumingu último. Ounke ku Kuerpo di Bombero a terminá e trabounan di pagamentu, tòg e bientu fuerte di awe mardugá a logra lanta e kandela atrobe.
E kandela ku a kuminsá awe mardugá a bolbe kousa molèster di huma den e besindario. Tantu habitantenan komo muchanan di skol a sinti e efekto mes ora. Konsekuentemente mester a sera un kantidat di 4 skol mas awe mainta. Ta trata di Helfrichschool, St. Bernhardschool, Laufferschool i Krijtschool. Esaki a pone ku e total kantidat di skolnan ku a sera pa motibu di e kandela a bira 9. Djadumingu anochi despues di e kandela, a anunsiá ku Marnixschool lo a keda será. Djaluna mainta a sera 5 skol mas. Tabata trata di Ignatius College, St. Paulus College, Berg Carmel College, Stella Maris i J.F. Kennedy School.
No ta konosí kon largu e skolnan lo keda será.