Prof. dr. Lorito ta yama tur hende un felis djabièrnè. Lorito mester a kustumá bula atrobe tur kaminda. Ayera nochi mes nos mester a bula bai den e área di WTC pa nos kapta algu di Living 2008. Hopi hende tabata presente i esei sigur ta bon notisia pa e organisadónan. Living 2008 ta sigui awe, mañan i djadumingu. Tin masha kos di wak!
****
Nos ta sinta hopi tempu ku un pregunta masha klave. Imaginábo bo ta independentista i bo haña un distinshon di Kas Real. Kiko lo bo hasi? Ta masha poko hende di prinsipio nos a topa, anti-monarkista (ku nan derechi!) ku a disidí ku nan no ta aseptá. Un di nan ku nos ta kòrda ta Adriaan Moen. Nos konosé hopi hende ku ta bisa ku nan no ke dil ni ku gobièrnu ni gobernantenan ulandes, pero finalmente ta haña nan ta baha pa nan prinsipio.
****
Awe tabatin entrega di Zilveren Anjer na un di e personanan mas destaká den nos komunidat ku ta Òmpi Elis. Despues di morto di Prens Bernhard a bin masha detaye riba su bida bruá ku a pone e prens den un otro lus. E pregunta ta surgi: mester aseptá e distinshon di su fondo na su nòmber si òf no? E ta un pregunta masha interesante ku por ta tin hende tin pensamentunan riba dje. Laga nos sa kiko bo ta pensa!
****
Na Ulanda mes a diskushon rondó di Kas Real ta masha fuerte. Enkuestanan ta indiká ku mas i mas hende ta haña ku Kas Real no ta pas mas ku nos tempu moderno. E kos mas remarkabel ta ku nan ta papia liber tokante di e tema (sin miedu). Ántes tòg tabata otro, por sierto na Kòrsou tambe. Sigur e ta un tema ku meresé mas diskushon aki tambe!
****
Nos a sigui henter e asuntu di índise di referensha (VIA-regeling) i nos ta kere ku Parlamento ta hasi bon huntu ku Gobièrnu di manda un señal den direkshon di Ulanda. Si pueblo a skohe pa un reino, no por tin interpretashon den un di e partinan di reino diferente. Den e kuadro aki nos no a gusta masha ku ora ulandesnan bin Kòrsou nan mester yena un papel pa nan drenta aki. E kos ei ta masha antikuá. Ora nos bai Ulanda nos no ta haña niun papel pa nos yena. Tur e asuntu aki di papel pa yena den reino, mester eliminá e kos aki mesora!
****
Bo ta kòrda poko dia ei nos a bisa ku tin un kaso mahos na kaminda di un kompania di Gobièrnu? No kere ku nos a lubidá. Nos a puntra i a trata di despistá nos, pero nos a insistí i awor nos a haña sa ku e kaso ta mas mahos ku nos a kere. E kos mas tristu ta ku e mahosheid di e kaso ta bin di hendenan ku (ta pretendé) no ta dje mahos ei! Nos ta tuma e kompania masha na malu ku nan a trata di desakreditá nos informashon. Nos lo bin bèk pisá pa nan. Nan wanta nan kurpa!
****
Nos a keda masha kontentu ku Gabriel García Márquez a yama periodismo e trabou mas bunita na mundu, “There’s no better job than journalism. We enjoy it when we find a jewel (of a story), but suffer like dogs when we see language used badly,”. Esei ta djis un di e kosnan bunita ku e ganador di Premio Nobel, un kolombiano ku ta biba na Mexico, a bisa.
****
Bo a ripará ku mas i mas periodista ta drenta polítika i hasta bira presidente? Bo tabata sa ku Sarah Palin tabata un periodista? Awor bo sa! Nos ta keda te aki awe. Kuida kurpa, kuida bo mes, kuida bo komunidat. Te mañan ku Dios su poder!