WILLEMSTAD – LA PRENSA a risibí un ‘mail’ di John Redington, un turista ku a bin Kòrsou for di Port Mansfield, Texas. E turista merikano (direkshon ta konosí pa redakshon di LA PRENSA) a splika ku nan famia a keda hopi desapuntá ku e sushedat ku nan a mira tur kaminda.
Sr. Redington ta splika LA PRENSA den su karta ku su famia a disidí di bin Kòrsou ya ku nan ta amante di buseo. Aña pasá nan a pasa nan fakansi na Boneiru i a disidí pa bin Kòrsou e aña aki.
“Nos tabata hopi desapuntá ku un isla ku asina hopi potensial pa ta bunita ta asina sushi riba tur nos ekspektativa,” Redington a bisa. “Mi no por komprondé kon Willemstad i habitantenan di e isla ta tolerá asina tantu falta di rèspèt pa nan barionan, komunidat i naturalesa.”
E turista ta bisa ku ta kibra nan kurason di mira sushi bentá tur kaminda asina. “Gobièrnu no tin hende òf kompania ku ta rekohé sushi?”, e ta puntra. “No tin ningun lei ku ta prohibí esaki? Mi ta mira e kònteinernan di sushi si, pero tòg kayanan i playanan ta dòrná ku glas kibrá, plèstik i papel, sigaria i tur otro tipo di sushi.”
E ta remarká ku aña pasá el a tuma nota ku na Boneiru tin e mesun problema aki, pero no na e magnitut di aki na Kòrsou.
“Mi ta realisá ku turismo no ta e fuente mas importante di entrada pa Kòrsou, pero mi ta suponé ku e ta un parti grandi si. Mi ta realisá tambe ku hende ta kustumbrá ku kondishonnan ku ta ménos ku loke mester ta. Sinembargo mi ta kere ku ainda por trese kambio den nos espektativa. Ta kibra mi kurason pa e falta di rèspèt pa un lugá ku por ta asina bunita.”
E turista finalmente ta hasi un yamamentu na habitantenan, doñonan di empresa i funshonarionan di gobièrnu pa pone orguyo di e isla na promé lugá i protehá i kuida e isla aki manera un yu ku bo ta stima, limpia Kòrsou.
“Boso por benefisiá di esaki i saka probecho pa generashonnan di futuro,” asina John Redington, un turista merikano ku a bin Kòrsou for di Texas, a bisa finalmente.