WILLEMSTAD – Mama di e defuntu Ronarvey Franca, asesiná den Kaya Amatista, mes ta investigando morto di su yu. Segun e mama, Ministerio Públiko no a hasi nada pa solushoná e kaso. Entretantu e mes a kompilá tur dato relevante i ta na punta di solushoná e kaso e mes.
Tabata dia 3 di aprel último ku polis a haña e víktima bentá riba kaya dilanti di un outo, sin ta duna señal di bida. E tabatin alrededor di 12 heridá na su kurpa kousá pa bala prosedente di un arma di kandela. Mes ora rumornan a kuminsá sirkulá ku ta Marnol Bart lo a asesiná Franca. Mama di e víktima a bisa LA PRENSA, un dia despues di e suseso, ku si polis a detené Bart un dia promé ku e suseso, su yu lo no tabata morto. E mama a konta ku un dia promé ku e suseso, den oranan di mardugá, Bart a dal e un moketa den su kara. Siguiente dia algun hende a tira riba su outo ora el a pasa den Kaya Amatista, i ora el a hisa su kara pa wak ta ken, el a mira entre otro Bart.
Mama di e víktima a splika LA PRENSA ayera, ku Ministerio Públiko no ta investigando e kaso mas. “Fiskal Schoop ku ta atendé a kaso a bisami ku e aparato ku nan ta usa pa hasi investigashon tabata dañá i p’esei e investigashon a para. E fiskal a bisa mi tambe ku el a duna òrdu pa detené Bart i Clemensia i ku e no ta komprondé kon Bart a logra sali for di Kòrsou. Mi a komprondé ku Bart tin un dil ku O.M. i ku e tin ku haña sèn serka O.M. Ta p’esei nan a lag’é bai for di Kòrsou pasó e no tabatin ni pasport.”
Investigashonnan ku LA PRENSA mes a hasi algun tempu pasá, a indiká ku dado momentu fiskal mayó Gilbert Joubert lo a puntra algun polis kon bin e investigashon ta tardando asina tantu. E polisnan lo a kontestá ku ta fiskal Schoop no a duna òrdu pa arestá e sospechosonan. LA PRENSA su informante a splika ku ora a bai lesa tur e relatonan di fiskal Schoop, a resultá ku debidamente Schoop a duna òrdu pa detené dos sospechoso, inkluso Bart. LA PRENSA a trata awe na haña konfirmashon di esaki serka fiskal Schoop, pero el a para riba ku e no por papia na nòmber di Ministerio Públiko. Ora a puntr’é si e por informá e bosero di O.M. ku LA PRENSA ta bai yama djaluna mainta pa haña konfirmashon, el a kontestá ku ta te djaluna mèrdia e ta bai traha.
E mama di e defuntu a splika, ku ora el a kuminsá investigá ta kiko a pasa ku su yu, el a konkluí lo siguiente: “E dia di e suseso Karusi Bart, ruman di Marnol, huntu ku un amigu di dje Pieter, a bin buska mi yu na kas. Mi yu a drenta den su outo huntu ku nan i nan a bai na kas di Bart den Kurá Pieda. Dado momentu un mucha muhé a yama mi yu riba su selular i bis’é pa e kana bin na kas di Wèn (polis a detené Wèn i a lag’é bai pa falta di prueba). Ronarvey no sa bai kas di Wèn nunka. Ora mi yu a yega na kas di Wèn, Kamban, un hopi bon amigu di Ronarvey, a bis’é drenta den kurá. Einan nan a tir’é mata. Despues nan a his’é i bent’é dilanti di kas di Wèn. Un testigu a bisa ku el a tende nan bisa ku Ronarvey ta pisá. Ora nan a pon’é riba kaya, nan a pone su pèchi banda di dje. Despues Karusi a kue e outo di Ronarvey ku tabata stashoná dilanti kas di Bart i bin pon’é dilanti kas di Wèn kaminda mi yu tabata bentá morto. Si bo wak bon, e outo no tabatin niun perforashon di bala, miéntras a tira mi yu ku mashingùn. E balanan mester a perforá e outo, si ta einan a tira mi yu.”
LA PRENSA a kombersá ku bosero i trahadó sosial di e Büró pa Ayudo di Víktima, sra. Leer, despues ku mama di Ronarvey a splika ku Leer tabata testigu ora fiskal Schoop a hasi su deklarashonnan. Leer a bisa LA PRENSA ku e no ta niun tiki kontentu ku e manera ku e suseso akí ta bai sali den prensa, pasó tabatin bon palabrashon ku niun hende lo no bai prensa.