WILLEMSTAD – Un hòmber yu di Kòrsou di 32 aña di edat, kende a hasi un anunsio di bòm falsu riba un buelo di Insel Air dia 24 di yüli último na Princess Juliana International Airport (PJIA) na St. Maarten.
E hòmber aki a tende Korte dikta sentensia den e kaso aki ayera i a risibí tres luna di kastigu, pero esaki lo keda suspendé i tambe lo tin ku traha 120 ora pa servisio di komunidat.
Anteriormente tratamentu di e kaso aki a wòrdu suspendé siman pasá pa motibu ku e abogado defensor, Luigi Virginia a proba ku e no tabata den poseshon di tur dokumentonan. Komokiera ku e sospechoso, e abogado i e Wes tur ta biba aki na Kòrsou, a disidí pa sigui e kaso djaluna último.
Korte a haña proba konvinsentemente, ku Rocky Hoogenbergen a bisa ku e lo bula e avion despues di a rabia ku no a lag’é subi e avion. Personal di seguridat di aeropuerto PJIA a indiká, ku e sospechoso a yega muchu lat na salida i e tabata bebe.
E akto di e hòmber aki a pone ku e aeropuerto di St. Maarten mester a aktivá henter nan prosedura di emergensia ku tur konsekuensia di esaki. Mester a yama polis, ambulans, bomberonan na e sitio. Mester a sera tur kaya rondó di e aeropuerto.
E avion a yega St. Maarten prosedente di Sto. Domingo i tabata saliendo pa Kòrsou. E pasaheronan abordo di e avion a eksperensiá un retraso di tres ora.
Despues ku a kontrolá e avion i no a haña ningun material eksplosivo a duna e avion liber pa sigui su rumbo.
Insel Air ta kalkulá, ku e daño finansiero pa nan ta alrededor di 34 mil dollar, pero te ainda no a inisiá un prosedura pa rekobrá e daño for di e sospechoso.
Hoogenbergen no a ninga den Korte lokual el a bisa di lo bula e avion, pero a bisa si, ku nunka e tabatin e intenshon ei òf pone bida di e otro pasaheronan na bisa.
E fiskal na St. Maarten, Taco Stein a indiká algun tempu pasá, ku Princess Juliana International Airport Enterprises (PJIAE) awor lo kuminsá eksigí di pasaheronan ku hasi tipo di menasanan falsu asina aki pa kubri e gastunan di e proseduranan di emergensia. Esaki sigur si e akto aki bira algu komun. “Nan a bisa mi, ku nan lo no trese kargo kontra di ningun hende awor, basta esaki no bira algu ku ta sosodé regularmente.”