Profeshonalnan di awendia tin sigur ocho trabou entre 18 pa 32 aña di edat; esaki segun Departamentu di Estadístika Laboral Merikano. Hopi empresa na Kòrsou tin e realidat ku ta parse di ta un reto pa keda ku empleado den servisio, pa un tèrmino largu.
Kiko por ta motibu ku hendenan no ta keda na un trabou maske ku nan salario ta bon, nan tin kondishon di trabou ku nan ta di akuerdo kuné i trato general ta bon pa ku nan?

Pa komprondé esaki mester komprondé kiko un hende ku drenta servisio den un empresa ta haña importante. Hopi hende mester traha i tòg nan lo a preferá di hasi otro kos. P.e. traha den nan mes negoshi, keda kas hasi floho òf keda wak yu ku ñetu. Simplemente mester komprondé awendia ku maske un hende ta presentá su mes masha positivo pa haña e trabou, tòg tin chèns ku su balor i motivashon pa e trabou lo no ta loke e empresa mester.
Realidat ta, ku un empresa mester di su empleadonan i nan ta di gran balor pa e empresa. Tur empresa ta trata na tene nan bon empleadonan i lógikamente duna nan oportunidat pa por move den un karera den e empresa na benefisio di tantu e empleado i lógikamente tambe di e empresa.
E arte ta pa inspirá un bon trahadó ku ta físikamente den un empresa, pero ku su mente pafó di dje, pendiente di kiko ku ta otro ku e por haña pa algu mas di salario i pa e bai, sin tene kuenta ku niun proseso pendiente ni kanando den e empresa. Hopi empleado ta demostrá di asina ei di no tin kunes ku e empresa; ta un salario e ke.

Ora mira kon sierto empresa tin hende ku ta keda 10, 20, 30 òf hopi mas aña den mesun servisio ta interesante pa sa kiko tabata rason pa e lealtat aki. E impreshon general tabata ku hendenan lo ke ta den servisio di un empresa ku ta garantisá nan kontinuidat di trabou i seguridat di entrada. Pero e kambio den último dékadanan di kuantu tempu un empleado ta skohe pa keda den servisio i pakiko, maske ku tin stabilidat di trabou i di entrada; ta algu ku empresanan serio no por kontrolá.
Empresanan mester keda trata konstantemente na krea un ambiente ku ta stimulá lealtat pa empleadonan keda. Pasobra ora un empleado bai sin a kaba ku prosesonan kanando, e ta okashoná (pa malu òf no) problemanan i gastu pa e empresa ku konsekuentemente ta òf por influensiá dunamentu di servisio i di produkshon.
E reto ta pues pa ku kada empleado nobo tuma e riesgo di ta invertí pòrnada den rekurso humano, pero na mes momentu ku por ta esaki si ta e empleado ku ta bai hasi uso di benefishinan ku tin den un relashon duradero i stabil den mesun empresa.
Aki pues tin trabou pa tantu e empleado komo pa e dunadó di trabou. E empleado, si e ta serio ku su mes, ku su futuro i ku su trabou, lo por buska un mèntòr pa yud’é plania i move den un empresa.
E empresario mester plania kon ta laga empleadonan sinti nan mes na kas den e empresa i realisá posibilidatnan di ta na e trabou aki.
Rèspèt di tur dos banda ta masha nesesario i importante pasobra tur dos mester di otro.

Tur empresa mester ten’é bon tambe na kuenta ku hopi empleado realmente no ta keda den servisio pasobra no ta e trabou ni e empresa ta e problema, sino muchu biaha kosnan personal. Si nan no ta gusta e hefe, si nan no ta gusta ku nan mester traha supordinado di un hende ku pa nan no ta hende pa respetá, si nan no ta sinti konfiansa den stabilidat finansiero di e empresa òf si nan partner/kasá no ke pa nan traha.
E falta di lealtat laboral visibel den empresanan na Kòrsou ta un problema sigur, pero kon por solushon’é?

Bon siman i bishitá mi blòg riba www.notabel.com.
Por komuniká ku Reyna Joe na info@notabel.com.