WILLEMSTAD – Habitantenan di Jongbloed, prinsipalmente esnan den Ledaweg i Casandraweg, pa simannan largu ta sufriendo na man di ladronnan ku ta hòrta pipanan di awa. Habitantenan tin vários siman ta lanta mainta sin nan pipa di awa, ya ku ladronnan ta drenta den kurá i ta kòrta nan pipa di awa. Tin vários di e kaso ku polisnan mester a sali den oranan di mardugá pa atendé di e tipo di ladronisia aki. Te ku awe ainda tin habitantenan di e área aki a lanta mainta sin nan pipanan di awa i konsekuentemente ta perhudiká esnan ku mester bai skol i trabou.
Tin di e kasonan aki no ta kai spesífikamente pa Aqualectra, pero siman pasá tabatin un kaso, den kua e ladronnan aki a kòrta te asta e parti ku ta bai promé ku e meter, lagando awa ta basha den kaya aki. LA PRENSA mes tabata testigu den oranan di awe mainta di un famia ku a lanta sin nan pipa di awa, perhudikando e famia aki. E ladronnan ta operando den vários barionan di Kòrsou hòrtando e pipanan di koper pa bai bende ku negoshinan ku ta kumpra koper i aluminio bieu pa bende den eksterior.
E modus operandus aki ta, ku e ladronnan ta kòrta e pipa despues di e meter di Aqualectra sakando esaki for di bou di tera pa bai ku esaki. Den nan operashon ta laga otro destrukshon atras ku no ta únikamente e pipa. Den e kaso di e kas di awe mardugá, kibra asta e filter ku tin pegá na e pipa, lagando esaki bentá un banda. Tur e kasonan aki polis a presentá, sin por hasi masha. Segun informashonnan ku LA PRENSA a risibí tin mas ku 1 luna kaba ku ta operando den e besindario di Jongbloed, ya ku tur dia habitantenan ta lanta sin awa, pa despues deskubrí ku ta nan pipa a kòrta.