WILLEMSTAD – Kuerpo Polisial a krea e impreshon ku e ta solushonando mayoria kaso di asesinato kometé e aña akí. Durante un konferensha di prensa ayera, e polisnan ku a presentá a papia di detenshonnan ku polis a hasi den kasonan di asesinato sin menshoná ku entretantu a laga diferente di e sospechosonan bai.
E konferensha di prensa tabata pa informá tokante di sifranan di krímen ku polis a registrá e aña akí. Durante presentashon di e sifranan di asesinato, tabatin un ilustrashon ku ta indiká den un kolòm, si a detené un sospechoso relashoná ku e kaso. Riba e ilustrashon por a mira e diesinku kasonan di asesinato e aña akí, di kua tras di dies di nan tabatin skibí ‘ja’ den e kolòm ‘detenshon’. Esaki pa indiká ku den e kaso spesífiko a detené un sospechoso. Riba promé bista esaki ta krea e impreshon ku den dos tersera parti di e kasonan polis tabatin éksito ku nan investigashon. Sinembargo polis a keda sin bisa ku entretantu a laga diferente di e sospechosonan ku tabata detené bai kas.
Un rekuento ku LA PRENSA mes a hasi ta indiká ku aktualmente tin sospechosonan detené relashoná ku solamente seis di e diesinku kasonan i no dies di e diesinku kasonan manera polis kier a laga parse ayera. Den dos kaso Ministerio Públiko mester a laga e sospechoso bai pa falta di prueba i den un kaso wes no a sentensiá un sospechoso. Esaki ta nifiká ku den nuebe di e diesinku kasonan polis no tabatin éksito den su investigashonnan. Ta remarkabel ku polis a skohe pa papia di ‘detenshon’ na lugá di ‘kaso solushoná’. Un sospechoso detené no ta garantia ku e kaso ta solushoná.
E sifranan di ladronisia di vehíkulo ta indiká ku e aña akí tabatin, te ku luna di ougùstùs, 163 kaso. Na 2007 tabatin 379 i na 2006 250. Pa loke ta trata e kasonan di atrako, polis a informá ku e aña akí, te ku luna di ougùstùs, tabatin 277 kaso kompará ku 356 aña pasá i 683 na 2006 tambe te ku luna di ougùstùs. E lokalidatnan kaminda a tuma lugá un atrako entre 2004 i 2007 tabata: (1) riba kaminda públiko 1453, (2) 919 na lokalidatnan komersial, (3) 711 den kasnan di famia, (4) 148 na sitionan públiko, (5) 62 na diferente otro sitio, (6) 9 na instansianan di gobièrnu i (7) 8 na institutonan di enseñansa.