WILLEMSTAD - Ku un mashin grandi, diputado Anthony Godett a duna señal pa kuminsá ku e trabounan pa drecha Kaminda pa Soto. Esei a sosodé ayera tardi, na altura di San Juan Center. Servisio pa Obra Públiko (DOW) a kuminsá di e forma aki ku e trabounan pa drecha Weg naar Soto. Ta trata di e parti entre aki na San Juan Center i ofisina di dòkter na Soto. E proyekto aki ta karga e nòmber di “Rekonstrukshon Kaminda pa Soto fase III”.
E trabounan lo tin durashon di aproksimadamente 21 siman.
Manera ta konosí, anteriormente a drecha entrada di Weg naar Soto na altura di Krakeel ku tambe tabata den kondishon pésimo. Tur hende por a weta kon e entrada aki a keda, un kos bunita i e ta mas seif pa tráfiko, segun diputado Godett.
Awor ta bai drecha e parti aki entre San Juan Center i e ofisina di dòkter na Soto ku tin un largura di 3 kilometer. E intenshon ta – manera ya a bira kustumber ora DOW ta ehekutá e tipo di proyektonan asin’aki – pa konstruí un kaminda ku ta bai pa hopi aña. E intenshon ta pa, despues di saka e fundeshi bieu, pone un fundeshi nobo di 25 centimeter di pieda blanku (e asina yamá “kalksteen”). E promé kapa di asfalt (konosí komo “binder”) i e kapa final di asfalt lo ta huntu 9 centimeter, ku ta garantisá un durashon muchu mas largu.
“En prinsipio e trabounan lo tin un durashon manera m’a bisa kaba di mas o ménos 21 siman. E ta un periodo ku por parse largu, pero mi ta konvensí ku pronto boso lo disponé di un kaya nobo, bunita pa hasi uso di dje,”e mandatario a agregá.
Herman van der Laan, direktor di e kompania MNO Vervat a bisa ku e ta kontentu ku e proyekto na Bándabou. Mi trahadónan, ku pa un gran parti ta hendenan di Bándabou awor por traha den nan mes área, el a bisa. El a mustra si di no ta komprondé pakiko aprobashon final di tipo di proyektonan asin’aki tin ku tarda asina tantu.
Siman pasá DOW, den koperashon ku otro instansianan a tene un nochi di informashon pa habitantenan di Soto na Landhuis Pannekoek. Tabatin hopi pregunta krítiko riba diferente aspekto di e trabou.
Último añanan DOW a bin ta hiba un maneho kaminda ta papia ku habitantenan, tende nan punto di bista i purba mas tantu posibel di kumpli ku nan deseo. E sistema di konsulta aki ta dunando su frutanan. Nos a konosé hopi proyekto ku a kana sin doló di kabes, segun e diputado pasobra hustamente a hasi e trabou huntu ku habitantenan.
E trabounan ta den man di e kontratista MNO-Vervat i lo kosta 3.9 mion florin. “Nos ta konsiente ku e trabounan lo trese sierto inkonbeniensia pa habitante en partikular i usuarionan en general den e área aki. E trabounan en todo kaso lo tin konsekuensia pa tráfiko den bario di Soto. Lo ta nesesario pa aki-aya adaptá situashon i desviá tráfiko, pero tur esaki ta pa garantisá ku trabounan lo kana mas rápido i mester tene pasenshi,” Godett a agregá.
Despues di Soto fase III, lo ehekutá e último parti, ku ta e proyekto dilanti di Don Sartoschool ku ta keda un tiki mas pabou ku e ofisina di dòkter na Soto. Aki lo bin un proyekto kaminda ta krea mas siguridat pa muchanan di skol, alsera mas adekuá pa hende na pia i kaminda ta hasi e área mas bunita. Na su debido tempu, nos ta bini bèk riba e proyekto aki, diputado Godett a finalisá bisando.