WILLEMSTAD – Kòrsou a avansá hopi leu den negosiashonnan pa un status Outónomo den Reino. “Es mas, Kòrsou lo haña un status outónomo kompleto, kontrali na loke opositornan ta bisando”, asina diputado enkargá ku Struktura Estatal Zita Jesus-Leito a bisa despues di e deliberashonnan ku a tuma lugá ayera. E deliberashonnan a kulminá den akuerdo riba diferente aspekto importante, manera e lei di polis ku tabata asina tantu den diskushon. Ta parse manera kos ku prinsipalmente Ulanda a haña e mensahe kla ku Kòrsou (i Sint Maarten) lo no aseptá un Kuerpo di Polis ku ta supordiná na Ulanda òf outoridatnan ulandes, manera e minister di Hustisia di Ulanda. Ayera Ulanda a bin ku un posishon mas fleksibel den e diskushonnan, loke a pone ku a yega na un akuerdo riba diferente punto, inkluyendo e struktura i responsabilidat pa Kuerpo di Polis den futuro.
Ku e deliberashon di ayera a konkluí, ku no tin nada mas pa stroba un Konferensha di Mesa Rondó dia 15 di desèmber awor, asina sekretario di Estado Bijleveld (Relashonnan di Reino) a bisa despues di e deliberashonnan ku mandatarionan di Antianan Ulandes, Kòrsou i Sint-Maarten durante un deliberashon polítiko na Willemstad (Kòrsou).
Den e kumbre polítiko a logra un akuerdo riba legislashon polisial pa e relashonnan estatal nobo. Punto di salida di e legislashon polisial nobo ta un organisashon polisial di kalidat sobresaliente i íntegro. Na momentu ku Kòrsou i Sint Maarten bira pais den Reino, nan ta haña kada unu su propio kuerpo polisial. Boneiru, Saba i Sint Eustatius, konhuntamente, ta haña un kuerpo polisial, na momentu ku e islanan aki bira un munisipio partikular (‘bijzondere gemeente’) di Ulanda.
E tres kuerponan den e parti karibense di Reino ta koperá ku otro, di moda ku miembronan di e tres kuerpo polisialnan lo ta kualifiká pa aktua na tur e sinku islanan. Lo bini ademas un previshon konhunto den kua e kuerponan lo koperá ku otro den e lucha kontra kriminalidat organisá i ku ta atravesá frontera i den kaso di sosten operashonal.
Na Kòrsou i Sint Maarten mantenshon di órden públiko i seguridat i dunamentu di asistensia ta kai bou di outoridat di e respektivo ministernan di Hustisia di e paisnan nobo.
Na Boneiru, Saba i Sint Eustatius (Islanan BES) e minister ulandes di Asuntunan Interno i Relashonnan di Reino i e minister ulandes di Hustisia ta responsabel pa e aspektonan ya menshoná. Fakultat di investigashon den asuntunan penal i fakultat i persekushon hudisial ta kai bou di outoridat di prokurador general. Pa agentenan polisial por aktua na tur isla a yega ademas na palabrashon riba ekipo, instrukshon riba tereno di violensia i sistema di rango. A hasi tambe palabrashon tokante interkambio di datonan polisial.
E organisashonnan polisial nobo lo hiba un maneho aktivo di integridat ku ta dirigí riba aktuashon korekto, prevenshon di abuso di kompetensia, konflikto di interes i diskriminashon. Lo fiha e akuerdonan ku a yega na dje den un lei di konsenso di Reino (“consensus rijkswet’).
Na e deliberashon a yega ademas na un akuerdo riba teksto di e lei di konsenso di Reino riba Konseho pa Mantenshon di Lei. E lei aki ta stipulá ku lo instituí un órgano ku lo inspekshoná e kadena di mantenshon di lei. E Konseho pa Mantenshon di Lei ta inspekshoná entre otro Polis, Ministerio Públiko, organisashon penitensiario i kuido hudisial di hubentut.
Tin un kombenio tambe riba supervishon riba finansa públiko, organisashon penitensiario i kuido hudisial di hubentut. Tin un kombenio tambe riba supervishon riba finansa públiko di e paisnan nobo Kòrsou i Sint Maarten. Diputado Jesus-Leito a bisa ku awor aki Kòrsou mester sigui traha riba su Konstitushon ku ta den fase avansá. Ta un operashon grandi ku ta bai eksigí hopi tempu i energia, pero pa kua ya kaba a kuminsá ku e proseso.
Pa loke ta trata e proseso di desmantelashon, e diputado a bisa ku pa esei mester di mas tempu pa atendé e efektonan. Pa mas lat e luna aki ta spera mas klaridat riba e proseso aki, asina e diputado a bisa.