WILLEMSTAD – Un grupo di habitante di Bándabou sumamente desgustá a denunsiá awe kon a sera e Playa di Daaibooi pa un fiesta privá. E habitantenan a reklamá ku e playa ta será pa un fiesta privá di un grupo di merikano mionario.
Dòlfi Debrot di Carmabi a splika ku ta trata di un playa públiko ku konstantemente mester ta habrí i ku pasashi liber pa tur hende por drenta. “E playa enbèrdat ta kai bou di Carmabi, pero ta hür nos ta hür’é ku un persona ku ta paga un montante tur luna i e ta atendé ku e playa. Mi mes no ta na altura di niun seramentu di e playa i kasi mi no por kere esaki tampoko.” Un investigashon chikitu a trese na kla ku e persona ku ta eksplotá e playa yama Kees van Dongen. Den un kòmbersashon ku van Dongen, el a bisa mes ora ku ta trata di un ‘misunderstanding’ i ku tur hende por bishitá e playa awe. “Nos tabatin e intenshon pa e sera e playa awe kompletamente pa públiko, pero esei a resultá di ta un eror. Entretantu nos a habrié bèk i tur hende por bin awe sin problema. Sinembargo ta un parti di e playa so públiko lo por usa, pasó a reservá un otro parti pa un fiesta privá.”
Loke a iritá e bishitantenan awe ta ku ora nan a yega na e kaminda ku ta kondusí pa e playa, nan a topa ku bewakernan di un kompania di seguridat, di kua LA PRENSA tin e nòmber. “Bou di niun sirkunstansia e bewakernan no kier a laga niun hende pasa”, un di e bishitantenan a deklará. “Ora ku nos a puntra e bewakernan si nan tin pèrmit pa sera e kaminda, nan a bisa si. Nos a haña e situashon masha remarkabel pasó ta un kaminda públiko i ta polis so por sera un kaminda públiko.”