WILLEMSTAD – Gobièrnu lo bai sembra den un fondo pa krea mas atleta riba nivel haltu ku partisipashon na Mundial 2009 i Weganan Olímpiko na 2012.
For di e 300 mil florin ku Gobièrnu Sentral a pone disponibel pa Weganan Olímpiko a sobra i ku e satisfakshon grandi ta biba awe den e pueblo. Minister Omayra Leeflang den un entrevista ku LA PRENSA ta splika e dia ku tabatin firmamentu pa e fondo ku a keda destiná pa partisipashon na Weganan Olímpiko a tuma lugá den un sala bashí ku únikamente 1 periodista ku tabata presente. Awe un i tur por mira ku e vishon ta kompletá, ya ku a usa fe pa inbertí, ya ku fe ta nifiká kere den kosnan ku ainda no tei.
E frutanan awe ta bisto i ku lo sigui traha duru pa na Weganan Olímpiko na 2012 lo tin partisipashon di un hende muhé. Minister Leeflang ta hasi menshon di nòmbernan manera Bryan Mariano, Prince Kwidama i deportista Bell di St. Maarten mester ta figuranan ku lo sobresalí den e próksimo olimpiada. Promé ku esaki na 2009 lo inbertí pa mundial i ku sigur lo bolbe mira Churandy Martina den akshon huntu ku otronan ku lo bai forma parti di e kompetensianan aki.
E mandatario ta mustra ku e invershon den weganan olímpiko a kontribuí pa e komunidat komprondé ku olimpiada ta un deporte tòp i importansia di deporte olímpiko a keda aseptá pa e pueblo. E partisipashon di Churandy Martina a logra ku deporte olímpiko a lanta para i ta kontribuí ku tur loke tin abou tambe ta bin ariba, segun minister Leeflang ta deklará na LA PRENSA.
Gobièrnu Sentral lo bai sembra den un proyekto riba durashon largu, pero ku lo karga e frutanan ku e pueblo lo gosa di dje. Durante e diskurso den Stadion Ergilio Hato awe nochi minister Omayra Leeflang lo revelá ku lo bai sembra pa un nivel mas haltu den deporte. E fondo ku lo bai sembra ta pa por hasi diferensia den 2012 i krea mas espektákulo den deporte olímpiko. Ku mas espektákulo mester bira mas partisipashon di atletanan den Weganan Olímpiko.
Mester mira ku Ulanda a prepará pa tin fondo pa prepará, asina Antia tambe a prepará ku 300 mil florin i sobrá. Ulanda a usa 325 mil euro den preparashon. E federashon mester prepará e atleta ku mester yega klasifikashon, pa despues Gobièrnu tuma esaki over pa sigui logra e vishon. Federashonnan ta haña supsidio for di e komité, di manera ku nan mester hasi trabounan di preparashon pa produsí atletanan riba nivel haltu.