WILLEMSTAD - Miembro di parlamentu pa frakshon di Forsa Kòrsou mr. Glenn Camelia ta haña ku ta imperativo pa Antia sa kon e ta para awor aki den e krísis finansiero ku ta afektando mundu kompleto. Camelia a bisa esaki, despues di a tende presidente direktor di Banko Sentral di Antia splika e situashon finansiero di nos pais, despues di e krísis ku a surgi riba merkado merikano, pero ku entretantu ta afektando un parti grandi di mundu.
Dia 19 di sèptèmber, Glenn Camelia a manda un karta pa gobièrnu den kua e ta lansa un seri di pregunta relashoná ku e tema aki. Alabes el a hasi un petishon pa un reunion di parlamentu den kua e outoridatnan relevante mester tei presente pa duna e splikashon nesesario. Mester bisa ku e reunion a tuma lugá ayera, un dia ku no a kai den e siman di reunion di parlamentu. Esaki a bira nesesario, pasobra minister di Finansa Ersilia de Lannooy lo no ta na Kòrsou otro siman – ku si ta siman di reunion di Staten – en konekshon ku e hecho ku e lo ta na Washington pa partisipá na e reunion anual di Fondo Monetario Internashonal. Ademas, tur hende ta di akuerdo ku otro ku e tópiko ta hopi importante i meresé ser tratá ku e urgensia nesesario.
Durante e reunion di ayera, tabatin presente, aparte di minister di Finansa, minister di Asuntu Ekonómiko, Direktorado di Finansa, gerensia di fondo di penshun APNA i gerensia di Banko Sentral. Glenn Camelia a ekspresá su satisfakshon ku esaki ta demostrá kon serio gobièrnu a tuma e asuntu.
Di otro banda, asina el a konkluí, despues di tende splikashon di Banko Sentral, di minister di Finansa i di APNA, ku ainda parlamentu no a haña e klaridat ku el a ferwagt di haña.
“Gobièrnu ta bisa, ku el a manda buska informashon serka institutonan finansiero, anto esei ta nifiká ku nos mester warda pa sa te kon leu e krísis a afektá nos kaba. Di otro banda nos a haña informashon basta konkreto di APNA kiko por ta posibel konsekuensia riba término kòrtiko. Nos ta spera ku esun di Banko Sentral pronto ta riba mesa, pasobra e asuntu aki ta hopi urgente, Camelia a bisa.