ORANJESTAD – For di vice-presidente di Sindicato Di Maestro Di Aruba
(SIMAR), Anna Tromp, nos a ricibi e siguiente comunicado di prensa na nomber di directiva di e sindicato menciona. E ta bisa textualmente asina:
Diaranson prome di october un biaha mas miembronan di SIMAR a aproba e maneho di e directiva actual votando contra e mocion di desconfiansa cu tabata pidi directiva pa baha di imediato.
Den un carta, presenta durante reunion na juni ultimo un grupo preocupa a trece un mocion di desconfiansa na unda a pidi pa directiva baha di biaha y den e mesun carta a presenta e directiva interino, cu mester a tuma rienda over. E mocion aki a wordo firma pa 3 pensionado.
Directiva a haci uso di su derecho di no trata e mocion al instante, pero tuma tempo y studi’e mas a fondo. A trata di sinta cu e firmantenan pa haya aclaracion riba e cinco consideracionan cu a conduci na e mocion, pero e firmantenan a haya cu tur cos ta cla y cu directiva ta rek e asunta manera kakiña. Den e ultimo Mensahero directiva a describi e asunto detayamente, a manda e mocion pa tur miembro y a pone directiva su ponencia/ contesta banda di esey pa cada ken saca nan mesun conclusion.
Den e reunion directiva di SIMAR a trece un biaha mas enfaticamente cu SIMAR no ta e directiva sinta actualmente, pero SIMAR ta tur miembro hunto. Den nan consideracionan e grupo preocupa a mustra directiva cu na diferente ocasion a desvia di su statutonan y nan a trata di haci’e zona manera cu tabata tin mala fe. E directiva actual a mustra un biaha mas cu semper a traha na bienestar di su miembronan y di enseñansa en general. Den tur turbulencia nan a keda haci nan trabou y a interpreta e statutonan na bienestar (in het belang) di su miembronan y si no a sigui e statutonan a la pie de la letra den futuro e directiva aki y tur cu lo sigui lo ta hopi mas cauteloso. Na unda hende ta traha errorenan por wordo cometi y cualkier directiva mester di su miembronan pa control’e, gui’e y pensa hunto cun’e. SIMAR su statutonan ta data di 1984, mientras no a adapta e reglamento interno cu ta di tempo di VLA (Vereneging van Leerkrachten Aruba). Pues e reglamentonan Interno ya caba tin 40 aña bieu. Pesey tambe un prioridad ta pa adapta no solamente e statutonan, pero tambe e reglamento interno y pa haci esei mester un grupo di voluntarionan dedica. Den e ultimo 25 añanan sigur diferente biaha miembronan di directiva a trata di traha riba e adaptacionanan, pero no a logra, pues un yamada ta bai na miembronan cu ta interesa pa haci e trabou.

Den e reunion di diaranson ultimo miembronan presente a haci varios pregunta aclaratorio riba e maneho di directiva actual y tambe riba e consideracionan di e grupo preocupa. A trata di kita tur duda y pone un fin na tur rumor y storia cu tabata circula ultimo tempo. Resultado di e votacion tabata ta cu mayoria a rechaza e mocion y consecuentemente e directiva aki ta sigui cu su trabou.
Durante e anochi diferente proposicion a bini dilanti y den e proximo Mensahero lo bai mas extenso riba esakinan, ya cu nan ta trata asuntonan cu tin urgensia manera adaptacion di statutonan y comision di caha.
Nos por conclui cu na final di anochi SIMAR como sindicato representando tur maestro a sali vencedor y hunto, cu mutuo respet lo sigui traha na bienestar di enseñansa en general y di su miembronan en particular. E lema ta cu union ta keda haci forsa!

Pa finalisa directiva di SIMAR kier felicita tur maestro cu 5 di oktober, Dia mundial di Docente. UNESCO a inaugura e dia aki na 1993 y e dia ta representa e muestra di reconocimiento cu tin pa e contribucion grandi cu docentenan ta duna na educacion y desaroyo en general. E ta un dia pa duna aprecio na tur docente pa nan trabou. E tema di e aña aki ta TEACHERS MATTER! Esaki kiermen cu DOCENTENAN TA CONTA!
E don di alfabetizacion ta wordo transmiti di un generacion pa otro y na mes momento ta purba di lanta e amor pa sinja, e sed pa conocimiento. Ora comparti conocimiento ta adkeri abilidadnan y bidanan ta cambia.
Directiva di SIMAR kier uni su mes na e organisacionanan mundial y celebra e docentenan di Aruba y e papel central cu nan ta desempeña den e cuido y orientacion di mucha, hoben y adulto, guiando nan den e proceso largo di siñamento continuo.
Alaves directiva di SIMAR kier uni su mes na e yamada cu sindicatonan di docente rond di mundo ta haci riba 5 di oktober cu ta un peticion na e autoridadnan concerni, manera directivanan di scol y gobierno pa desaroya y brinda programanan di formacion adecua na nos cuerpo di docencia, pasobra docentenan ta importante. Escazes di docentenan cualifica ta stroba desaroyo integral di un comunidad.
Pa SIMAR cu lo bai celebra prome di juli 2009 su 40 aña di existencia formacion y emplea docentenan cualifica ta keda prioridad.Un biaha mas pabien na tur docente.Pa SIMAR boso ta conta, boso ta valioso.