ORANJESTAD- Cambio di clima ta un menasa cu ta colga riba islanan di Caribe. For di subida di nivel di lama, te na clima extremo unda ta varia for di secura te na inundacion. For di tormentanan mas intensivo y poderoso, te na desplaciamento di teranan agricultural of extinsion di especie biologico. E consecuencianan di cambio di clima lo tin efecto riba islanan di henter Caribe. E pronostico cu cambio di clima ta na caminda ta trece cune e necesidad pa prepara. Particularmente islanan chikito manera Aruba ta vulnerabel na hopi efecto cu por ta desastroso of hopi costoso.
Den cuadro di analisa e consecuencianan premira y pa prepara miho pa enfrenta cambio di Clima, Nacionnan Uni tin varios comision trahando pa compila datos necesario. Diahuebs proximo 9 di october 2008, sra Charmaine Gomes di Nacionnan Uni (Economic Comisión for Latin America and the Carribbean, ECLAC) su programa ambiental lo ta na Aruba pa reuni cu diferente stakeholder pa compila infomacion pa prepara un proyecto regional tocante di cambio di clima, su consecuencia y e prijs cu lo paga si no haci nada. Preparacion ta clave y compilando e datonan aki, paisnan rond mundo por compara cu inversion pa preveni ta menos caro cu placa pa cura of remedia.
E proyecto ta busca pa produci un rapport estilo Stern pa e region amplio di Caribe. E rapport Stern ta un rapport prepara pa Lord Nicholas Stern di Inglatera y e ta examina e aspecto economico di cambio di clima y e prijs halto cu lo paga pa falta di accion di parti di paisnan cu no prepara, adapta of mitiga e efectonan cu cambio di clima lo trece cune.
E proyecto ta encera 3 fase. Fase 1 ta encera examina e literatura y colecta informacion di diferente stakeholder (grupo di interes) local, cual lo forma un rapport nacional. E informacion aki lo ser usa door di un economista ambiental pa prepara un documento cual lo repasa e factibilidad door di haci un cost/benefit analysis comparando tumamento di accion na un banda y keda sin haci nada na otro banda.
Fase 2 ta envolvi compila tur e rapportnan nacional di tur pais den un solo analisis pa e region di Caribe pa loke ta trata cambio di clima. E fase tres ta encera e producto final den forma di un rapport estilo Stern pa henter Caribe.
Nacionnan Uni, comision ECLAC, ta inicia fase 1. Diahuebs proximo 9 di october, e representante lo reuni cu diferente stakeholder pa haya informacion di e sectornan na Aruba. Di e stakeholdersnan invita ta spera di tende nan punto di bista, cualkier preparacion cu nan ta tumando y cualkier dato relaciona cu gasto calcula door di cambio di clima. Si cualkier instancia tin dato of estudio documenta di loke ta e caso pa Aruba entorno di cambio di clima, lo aprecia nan participacion.
E reunion aki ta ser auspicia pa Ministerio di Medio Ambiente bou guia di sr. Gisbert Boekhoudt di Inspeccion di Salubridad y Medio Ambiente, en cooperacion cu varios instancia publico y priva. Pa mas informacion por tuma contacto via email rafael.kelly@aruba.gov.aw