ORANJESTAD- Diarazon prome di oktober ultimo, riba dia Internacional di nos Grandinan, FCCA a firma contract cu e contratista Bellagio pa hasi trabounan di adaptacion y expancion na e edificio di FCCA na Paradera.
FCCA a yega na acuerdo cu e Stichting Thuiszorg pa acomoda e clientenan di e fundacion den e edificio aki na Paradera. Un proyecto cu ta conforme e meta di FCCA y ta cuadra cu maneho integral pa ofrece vivienda adapta pa cada cuidano. Esey a trece cune cu FCCA mester bay adapta y expande e edificio.
E proyecto aki ta ofrece Stichting Thuiszorg e posibilidad pa amplia e cantidad di clientenan, pero tambe ofrece e cliente un cuido di mas halto calidad. E edificio di FCCA na Paradera ta wordo adapta na e necesidad y exigencia pa e tipo di cuido cu Stichting Thuiszorg ta ofrece.
“Stichting Thuiszorg” ta un fundacion funda na aña 2004, cu e meta, cuido personal di e hende adulto y specialmente nos grandinan. Actualmente e fundacion ta opera den un cas na Piedra Plat cu por acomoda solamente 12 persona durante 24 ora. Addicional e fundacion ta ofrece tambe acomodacion pa durante dia so. Pronto e fundacion lo amplia su servicio den un edificio mas grandi cu por acomoda mas cliente.
E fundacion ta ofrece cuido di tur sorto pa e cuidadano adulto y nos grandinan. E costo di operacion di Stichting Thuiszorg ta wordo cubri door di pago mensual di e cliente y di donacion di diferente instancianan. Pronto tambe cu subsidio di gobierno.
E trabounan di adapacion y expansion di e edificio ta dura 6 luna y tin un costo di alrededor di 500 mil florin. E proyecto aki ta e prome fase for di un proyecto total cu ta inclui tambe 20 vivienda.
E 20 casnan lo wordo construi patras di e edificio ariba menciona y ta destina pa nos grandinan cu ainda ta mobil y por biba riba nan mes.
E plan ta cu e habitantenan di e casnan aki lo tin e posibilidad di ricibi ayudo di cuido si esaki ta necesario di Stichting Thuiszorg for di e centro di cuido. Pronto FCCA lo duna inicio na e proyecto di 20 cas aki.