WILLEMSTAD - Durante un reunion djamars awor, parlamentu di Antia ta trata e proposishon di lei ku ta destiná pa kombatí e fenómeno pornografia di mucha.
Frakshon di PAR, partikularmente minister di Enseñansa Omayra Leeflang semper tabata na fabor di e legislashon nesesario pa bringa e fenómeno aki i for di aña 2004 a entregá e proposishon di kambio al respekto. Leeflang ta kere ku tur mucha te ku 18 aña tin derechi riba e pida protekshon aki.
Resientemente, tabatin diskushon den komunidat atrobe, despues ku riba un wepsait a sali pòtrètnan pornográfiko ku tabata inkluí muchanan relativamente hóben. Un matutino ku a reprodusí e fotonan aki a okashoná indignashon serka sierto gremionan den komunidat.
E korant mes ta sostené ku ela simplemente reprodusí loke a sali publiká riba Internèt. E no a sinti su mes kulpabel pa esei.
Jacqueline Spencer, miembro di frakshon di PAR a bisa ku e hecho ku a entregá e lei no tin algu direktamente di aber ku e kaso aki.
Ta trata di un proposishon di lei ku tabata den preparashon pa algun tempu kaba. E lei a ser tratá kaba den reunion di Komishon Sentral i gobièrnu mester a kontestá algun pregunta ku miembronan di parlamentu tabatin.
Esei entretantu a sosodé. Minister Omayra Leeflang a kontestá e preguntanan di manera ku e ta kla pa tratamentu den reunion públiko. Jacqueline Spencer a rekonosé ku mester pone un fin na e situashon kaminda e tipo di kosnan aki ta sigui tuma lugá sin ku por tuma niun akshon kontra nan.
E lei ta papia di un but di maksimal 100 mil florin pa esun ku hasi su mes kulpabel na manehá òf distribuí material pornográfiko i e ta papia tambe di un periodo di 4 aña di prizòn máksimo.
E lei ademas ta proponé un ampliashon di medida kontra aktonan inmoral ku mucha.
Spencer ta kere ku banda di e lei aki, mester bin ku un kampaña pa konsientisá mayornan riba e peliger ku e kos aki tin pa nan yunan.
Mayornan ku ta konsiente di peliger ku e kos aki por tin, lo ta mas atento i mas konsiente ki menasa e por nifiká pa nan yu i por lo tanto por aktua mas rápido tambe, segun Spencer.