WILLEMSTAD - Korte na Rotterdam a dikta bida largu pa e antiano Brian R.
Ministerio Públiko a akusá e sospechoso di asesinato, un òf mas intento di asesinato i tambe un kaso di violashon.
E último kaso di tiroteo a tuma lugá den luna di yanüari 2007 na Katendrecht, pega ku Rotterdam. Na e okashon ei, un hòmber a bira víktima i a pèrdè su bida.
Ministerio Públiko ta papia di un kaso kaminda “un persona totalmente inosente a bira víktima di e rabia sin frontera di e sospechoso”.
Aparentemente lo a bati R. formalmente den un bar un ratu promé ku e insidente.
Pero segun Ministerio Públiko, ounke e víktima tambe tabata den e bar na momentu ku nan tabata batiendo R., e mes no tabatin nada di aber ku e asuntu.
Ministerio Públiko a akusá R. ademas di a violá un dama na Leeuwarden 2 luna despues. R. aparentemente a hasi algun deklarashon superfisial riba e kaso aki.
E sospechoso a ser kondená den pasado na diferente okashon kaba pa aktonan di violensia. Asina por ehèmpel nan a kondená R. na 1991 aki na Kòrsou pa atrako ku violensia na 3 aña di kastigu di prizòn. E tempu ei e tabata ainda menor di edat.
Na 1996 i 1997 korte na Ulanda a sentensi’é na respektivamente 2 aña i 30 luna di kastigu di prizòn, den tur dos kaso pa motibu di a hòrta tas di hende.
Na 2005 R. mester a sinta 2 aña, pa motibu di un kaso di sekuestro.
Segun Ministerio Públiko, esaki ta proba klaramente ku un kastigu di prizòn temporal no ta yudando R. ku nada.
Ta bin aserka ku e akusado no kier a koperá ku outoridatnan ku kier a hasi un investigashon di su estado mental. Esei mes ta pone ku no ta posibel tampoko pa kondená R. na tratamentu sikiátriko obligatorio.
Anteriormente, korte a sentensiá dos otro hòmber pa e mesun kaso di tiramentu aki di yanüari 2007 na respektivamente tres aña i mei i na 4 aña di kastigu di prizòn.