WILLEMSTAD - Parlamentu antiano a bai di akuerdo ku un proposishon pa e siguiente reunion di kontakto bipartite entre parlamentu di Antia i parlamentu di Aruba tuma lugá di 14 pa 17 di òktober benidero.
Parlamentu antiano a aprobá e proposishon aki djaweps último durante su reunion públiko pa trata e situashon di krísis finansiero na mundu i su efektonan pa nos pais. E enkuentro parlamentario bipartite ta tuma lugá na Aruba.
No a menshoná durante e reunion públiko kiko lo bira e temanan sentral di e enkuentro, pero ta konosí kaba ku tin diferente punto di prekupashon komun pa e dos parlamentonan. Un di nan ta e areglo pa registrá antianonan kriminal ku Ulanda ke introdusí. Raad van State resientemente a konkluí ku no tin niun motibu legal pa prohibí e medida aki.
Pero tin otro temanan tambe, manera último desaroyonan di e proseso di kambio estatal ku ta kanando.
E delegashon parlamentario antiano lo konsistí di un representante di kada partido polítiko representá den Staten.