WILLEMSTAD - Manera ta konosí, luna di sèptèmber tabata luna di kolekta di Fundashon Prinses Wilhelmina Fonds. Pa e okashon aki Sosiedat di Komersiantenan Hindú di Antia Ulandes tambe a partisipá den e proyekto aki teniendo un kolekta den tur komersio hindú, ku tin tantu na Punda, Otrobanda komo Zona Liber. Durante un enkuentro ku a tuma lugá djarason 2 di òktober mainta, direktiva di Sosiedat di Komersiantenan Hindú di Antia Ulandes a entregá un suma di 25.000 florin na señora Yvonne Verbrugge, Presidente di Prinses Wilhelmina Fonds, ku ta e kolekta total di tur e komersio hindú riba nos isla.
Tabata un enkuentro hopi interesante entre e dos organisashonnan aki, durante kua a diskutí puntonan di interes mutuo i kon por sostené otro den e lucha kontra di kanser. “E komunidat Hindú ta hopi entusiasmá ku e forma kon Prinses Wilhelmina Fonds ta yudando komunidat den e lucha kontra di kanser. Diferente di nos miembronan a mustra e interes pa envolví nan mes tambe huntu ku Prinses Wilhelmina Fonds pa asina di nos banda tambe duna un aporte na e lucha kontra di kanser na Kòrsou”, señora Kiran Mirchandani, Lider di Proyekto di e Asosiashon di Komersiantenan Hindú a deklará. Ya kaba a yega na sierto pensamentunan kon lo por bai traha huntu riba sierto proyektonan i tambe kon pa hasi e kolekta di otro aña mas efektivo.
Riba foto por mira d.r.p.d. Manu Sawilani (Presidente di Sosiedat di Komersiantenan Hindú), Kiran Mirchandani, Sapna Balani, Yvonne Verbrugge (presidente di Prinses Wilhelmina Fonds), Ghansham Bhagchandani i Ashok Thani.